കൊല്ലം: പണം ഉണ്ടാക്കാന് പൂര്വികരെ പോലും മറക്കുന്ന പുതുതലമുറയ്ക്ക് കാര്ഷിക സന്ദേശത്തിന്റെ വിത്ത് പാകുകയാണ് മങ്ങാട് രാജേഷ് ഭവനത്തില് പി.രാജന്.
കരാറുകാരന്റെ തിരക്കിട്ട ജീവിതത്തിനിടയിലും കാര്ഷികവിപ്ലവം തീര്ക്കുകയാണ് തന്റെ പുരയിടത്തില് ഈ അറുപത്തിനാലുകാരന്. വാഴ, ചേന, ചേമ്പ്, കാച്ചില്, മരച്ചീനി, ഇഞ്ചി, വെളുത്തുള്ളി, കിഴങ്ങ് വര്ഗങ്ങള്, മുന്തിരി ഇങ്ങനെ നീളുന്നു കൃഷികള്. 66 സെന്റ് സ്ഥലത്താണ് ഇദ്ദേഹം കൃഷിയിറക്കിയിരിക്കുന്നത്. 2012ല് കൊല്ലം കോര്പ്പറേഷന്റെ കിളികൊല്ലൂര് കൃഷിഭവന് ഏര്പ്പെടുത്തിയ കര്ഷകശ്രീ പുരസ്കാരം ഇദ്ദേഹത്തെ തേടിയെത്തിയിരുന്നു. 26 വര്ഷമായി ഇദ്ദേഹം സ്വന്തം പുരയിടത്തില് കൃഷിചെയ്യുന്നു.
വീട്ടിലെ ആവശ്യത്തിനും സമീപത്തെ ബന്ധുവീടുകളിലും വിഭവങ്ങള്ക്കായി ഇതില് നിന്നും ലഭിക്കുന്ന വിളവ് ഉപയോഗിക്കുന്നു. കൃഷിക്ക് ജൈവവളമാണ് ഇദ്ദേഹം ഉപയോഗിക്കുന്നത്. കൃഷിയിടത്തില് ആഞ്ഞിലി, പ്ലാവ്, ചീലാന്തി തുടങ്ങിയ വന്മരങ്ങളുമുണ്ട്.
സ്വന്തമായി കൃഷിചെയ്തു വിളവെടുക്കുമ്പോള് ലഭിക്കുന്ന സന്തോഷത്തിന് പകരം വെയ്ക്കാന് മറ്റൊന്നില്ലെന്ന് ഇദ്ദേഹം പറയുന്നു. ജീവിക്കാന് പണം ആവശ്യമാണ്. പക്ഷേ അതുപോലെ തന്നെ പ്രാധാന്യമാണ് വിഷ രഹിതമായ പച്ചക്കറികളും പഴവര്ഗങ്ങളുമെന്ന് രാജന് പറയുന്നു.
