വടകര: അതിരൂക്ഷമായ ഗതാഗതക്കുരുക്ക് കൊണ്ട് വീര്പ്പുമുട്ടുന്ന വടകര നഗര പരിധിയില് പുതുതായി ഓട്ടോറിക്ഷകള്ക്ക് ആര്ടിഒ മുനിസിപ്പല് പാര്ക്കിംഗ് പെര്മിറ്റ് അനുവദിച്ചതില് പ്രതിഷേധിച്ച് നാളെ 24 മണിക്കൂര് ഓട്ടോ പണിമുടക്ക് നടത്താന് ഓട്ടോറിക്ഷ ഡ്രൈവേഴ്സ് യൂണിയന് കോ-ഓര്ഡിനേഷന് കമ്മിറ്റി തീരുമാനിച്ചു.
വടകര മുനിസിപ്പല് അധികൃതരും, പോലീസ്, പൊതുമരാമത്ത് വകുപ്പ് എന്നിവരും ടൗണിലെ ഗതാഗതക്കുരുക്ക് തീരുന്നതുവരെ പുതുതായി പെര്മിറ്റ് അനുവദിക്കരുതെന്ന് വടകര ആര്ടി ഒയോട് ആവശ്യപ്പെട്ടിരുന്നു. ഇത് ലംഘിച്ചുകൊണ്ടാണ് പുതിയ പെര്മിറ്റ് നല്കുവാന് ആര്ടിഒ തയ്യാറായത്. വരും ദിവസങ്ങളില് ട്രക്ക് സംവിധാനം ബഹിഷ്കരിച്ചുകൊണ്ട് ആര്ടിഒ അധികൃതര്ക്കെതിരെ നിസ്സഹകരണ സമരവുമായി മുന്നോട്ടുപോകുവാനും കോ-ഓര്ഡിനേഷന് കമ്മിറ്റി യോഗം തീരുമാനിച്ചു.
യോഗത്തില് മതോങ്കണ്ടി അശോകന് അദ്ധ്യക്ഷത വഹിച്ചു. ഗണേശ് കുരിയാടി(ബിഎംഎസ്), കെ.വി. രാഘവന്, എം. കെ. പ്രസന്നകുമാര് (സിഐടിയു), പി. സദാനന്ദന് (ഐഎന്ടിയുസി), വി.വി. മജീദ് (എസ്ടിയു), വി.കെ. നന്ദകുമാര് (എഐടിയുസി). ഇ. രാജീവന് (എച്ച്എംഎസ്) എന്നിവര് സംസാരിച്ചു.
