കര്ക്കടക മാസം പിറന്നു. വിളവെടുപ്പിന് മുന്നോടിയായുള്ള പഞ്ഞകാലം. ശാരീരികമായും സാമ്പത്തികമായും കഷ്ടതകള് അനുഭവിക്കേണ്ടി വരുന്ന ഈ കാലങ്ങളില് ഇതിനെയെല്ലാം നേരിടാന് തക്കവണ്ണം മനസ്സിനെ ശക്തിപ്പെടുത്തേണ്ടത് അത്യാവശ്യമാകുന്നു. ഈ അവസരത്തിലാണ് രായണമാസാചരണം പ്രസക്തമാവുന്നത്.
രാമമന്ത്രം താരക മന്ത്രമാണ്. കലിയുഗത്തില് രാമ മന്ത്രത്തിന് പ്രാധാന്യമേറെയാണ്. കഠിനമായ സാധനകള്ക്ക് ചിത്തശുദ്ധിയും ഏകാഗ്രതയും ആവശ്യമാകുന്നു. ഏതൊരാള്ക്കും ശ്രമസാദ്ധ്യമായ ഒന്നാണ് രാമമന്ത്രജപം. നിഷാദനെപ്പോലും നിര്വ്വാണത്തിലേക്കുയര്ത്തുന്നതാണ് രാമ മന്ത്രം.
തോരാത്ത മഴയും പഞ്ഞവും കള്ളക്കര്ക്കടകത്തിന്റെ മുഖമുദ്രയായിരുന്നു. ഋതുക്കളുടെ താളങ്ങളില് വന്ന വ്യത്യാസങ്ങള് മൂലം കര്ക്കടകത്തിനും ഭാവഭേദം വന്നു. കാലങ്ങളായി കര്ക്കിടകം നമുക്ക് രാമായണ മാസമാണ്.
ക്ഷേത്രങ്ങളിലും വീടുകളിലും ഇതിന്റെ ഭാഗമായി രാമായണപാരായണം നടന്നുവരുന്നു. ഈ കാലങ്ങളില് രാവിലെ ഭവനങ്ങളില് ശീപോതിക്ക് (ശ്രീഭഗവതിക്ക്) വെക്കുന്ന ചടങ്ങ് അനുവര്ത്തിച്ച് പോരുന്നുണ്ട്. ആവണപ്പലകയില് ഓട്ടുരുളി വെച്ച് കോടി അലക്കിയത്, വാല്ക്കണ്ണാടി, ചാന്ത്, കുങ്കുമം, കണ്മഷി, അരി, നെല്ല്, ഗ്രന്ഥം, അഷ്ടമംഗല്ല്യത്തട്ട് എന്നിവ വെക്കുന്നതാണ് ഇതുകൊണ്ട് ഉദ്ദേശിക്കുന്നത്. കൂടാതെ ദശപുഷ്പങ്ങളായ കറുക, ഉഴിഞ്ഞ, പൂവ്വാംകുരുന്നില, നിലപ്പന, തിരുതാളി, മുക്കറ്റി, ചെറൂള, മുയല് ചെവി, കഞ്ഞുണ്ണി, കൃഷ്ണക്രാന്തി എന്നിവയും ശീപോതിക്ക് വെക്കാനായി ഉപയോഗിക്കുന്നു.
രാമായണപാരായണം ചെയ്താല് ആത്മീയ ജ്ഞാനം, ദീര്ഘായുസ്സ്, സുഹൃദ്സമ്പത്ത്, രോഗശമനം എന്നിവ ലഭിക്കുമെന്ന് വിശ്വസിക്കുന്നു.
‘ നിത്യവും രാമരാമേതി ജപിക്കുന്ന മര്ത്ത്യന്ന് മൃത്യു ഭയാദികളൊന്നുമെ
സിദ്ധിക്കയില്ലതേയല്ല കൈവല്യവും സിദ്ധിക്കുമേവനുമെന്നതു നിര്ണ്ണയം ‘
കലിയേയും കാലത്തെയും തരണം ചെയ്യുന്നതിന് വ്യക്തിക്കും സമാജത്തിനുമുള്ള മഹൗഷധമാണ് രാമായണം.
വേദാംഗമായ ആയുര്വേദത്തിന്റെ ദൃഷ്ടിയില് കര്ക്കടകം ഔഷധസേവനത്തിന് ഉചിതമായ കാലമാണ്. വര്ഷം മുഴുവന് ആരോഗ്യം പ്രദാനം ചെയ്യണമെന്ന പ്രാര്ത്ഥനയോടെ ഔഷധ സൂക്തം ജപിക്കുന്നു. കൊടുവേലി നെയ്യും ചേര്ത്ത് സേവിക്കുന്നത് ഈ മാസം വളരെ വിശേഷപ്പെട്ടതാണ്. നെയ്യ് ശീതവീര്യത്തെയും കൊടുവേലി ഉഷ്ണവീര്യത്തെയുമാണ് സൂചിപ്പിക്കുന്നത്.
ശീതോഷ്ണ വീര്യങ്ങളുടെ സന്തുലിതമായ സംയോജനമാണ് ഈ ഔഷധസേവയിലൂടെ ഉദ്ദേശിക്കുന്നത്. കൊടുവേലിക്ക് സംസ്കൃതത്തില് ചിത്രകം എന്നു പറയുന്നു. ശരീരത്തെ രക്ഷിക്കുന്നത് എന്ന് ഇതിന് അര്ത്ഥം വരുന്നു.
മരുന്ന് കഞ്ഞിയും കര്ക്കടകത്തിലെ ഒരു സവിശേഷതയാണ്. ഇല്ലം കെട്ടി, മുല്ലവേര്, കുറുന്തോട്ടിവേര്, പെരുവിന് കട, ജീരകം, ഉലുവ എന്നിവ ചേര്ത്തരച്ചാണ് കഞ്ഞി തയ്യാറാക്കുന്നത്. വിഷനാശക ശക്തിയുള്ള മഞ്ഞളും പാകത്തിന് ഇതില് ചേര്ക്കുന്ന പതിവുണ്ട്. വാത സംബന്ധമായ രോഗങ്ങള്, നടുവേദന, കഫത്തിന്റെ ഉപദ്രവം എന്നിവ ഇല്ലാതാകുന്നതിന് ഇത് ഉപകരിക്കുന്നു. കൂടാതെ ശാരീരികബലം വര്ദ്ധിപ്പിക്കുന്നതിനും മരുന്ന് കഞ്ഞി ഉത്തമമാണ്.
കൂടുതലായും ഇലക്കറികളാണ് ഭവനങ്ങളില് പാകം ചെയ്യുക. മുഖ്യമായും ചേമ്പ്, ചേന, തുവ, താള്, തകര, പയറ്, മത്ത, തവിഴാമ, ചീര എന്നിവയുടെ ഇലകളാണ് ഉപയോഗിക്കുക. നമ്മുടെ ചുറ്റുപാടുകളില് തന്നെ യഥേഷ്ടം വളരുന്നവയും ഔഷധ ഗുണങ്ങള് ഉള്ളവയുമാണ് എന്നതാണ് ഇവയുടെ പ്രത്യേകത.
