പത്തനാപുരം: പട്ടാഴി ദേവീക്ഷേത്രത്തില് നടത്താനിരുന്ന ഉപദേശക സമിതി തെരഞ്ഞെടുപ്പ് ഭക്തരുടെ പ്രതിഷേധത്തെ തുടര്ന്ന് മാറ്റിവച്ചു. ഹൈക്കോടതി നിര്ദേശത്തെ തുടര്ന്ന് നടത്താനിരുന്ന ഉപദേശകസമിതി തെരഞ്ഞെടുപ്പാണ് ക്ഷേത്ര സംരക്ഷണസമിതിയുടെയും ഭക്തരുടെയും എതിര്പ്പിനെ തുടര്ന്ന് മാറ്റി വച്ചത്.
പത്തനംതിട്ട ഡെപ്യൂട്ടി ദേവസ്വം കമ്മീഷണര് കെ.ആര്.മോഹന്ലാല്, കൊട്ടാരക്കര അസിസ്റ്റന്റ് ദേവസ്വം കമ്മീഷണര് ജി.രാജീവ് എന്നിവരാണ് തെരഞ്ഞെടുപ്പ് നടത്താന് എത്തിയത്. 1971ല് രൂപീകരിച്ച പട്ടാഴി ദേവീക്ഷേത്ര സംരക്ഷണസമിതി പിരിച്ചുവിട്ടുകൊണ്ട് ഉപദേശകസമിതി രൂപീകരിക്കുന്നതിനെതിരെയാണ് ഭക്തര് രംഗത്തെത്തിയത്. സംഘര്ഷ സാധ്യത കണക്കിലെടുത്ത് പത്തനാപുരം സിഐ സ്റ്റുവര്ട്ട് കീലര്, പുനലൂര് സിഐ കെ.എസ്.ബിനുകുമാര് എന്നിവരുടെ നേതൃത്വത്തില് വന്പോലീസ് സന്നാഹവും സ്ഥലത്തുണ്ടായിരുന്നു. അഴിമതിക്കാരനായ ഉദ്യോഗസ്ഥന്റെ റിപ്പോര്ട്ടാണ് ഉപദേശകസമിതി രൂപീകരിക്കാന് ദേവസ്വം ബോര്ഡിനെ പ്രേരിപ്പിച്ചതെന്നും റിപ്പോര്ട്ട് പഠനവിധേയമാക്കണമെന്നും ആവശ്യപ്പെട്ടാണ് ഭക്തര് തെരഞ്ഞെടുപ്പ് തടഞ്ഞത്. സംഘര്ഷസാധ്യതയുള്ളതിനാല് തെരഞ്ഞെടുപ്പ് നടത്താനാകില്ലെന്ന് ഹൈക്കോടതിയെയും തിരുവിതാംകൂര് ദേവസ്വം ബോര്ഡിനെയും അറിയിക്കുമെന്ന് ഡെപ്യൂട്ടി ദേവസ്വം കമ്മീഷണര് കെ.ആര്.മോഹന്ലാല് പറഞ്ഞു. സംഘര്ഷം ഉണ്ടാകുമെന്ന പോലീസ് റിപ്പോര്ട്ടിനെ തുടര്ന്ന് മുന്പ് രണ്ടുതവണ തെരഞ്ഞെടുപ്പ് മാറ്റിവച്ചിരുന്നു. ഉപദേശകസമിതി രൂപീകരിക്കണമെന്നാവശ്യപ്പെട്ട് കോണ്ഗ്രസ് നേതൃത്തിലുളള പത്തോളം പേര് മാത്രമാണ് എത്തിയിരുന്നത്. നിലവില് ദേവീക്ഷേത്ര സംരക്ഷണ സമിതിയുടെ നേതൃത്വത്തില് മികച്ച ഭരണമാണ് നടത്തിവരുന്നത്.
