വാഷിംഗ് മെഷീനിൽ തലയിട്ട യുവാവിനു പറ്റിയ പുലിവാൽ

ബെയ്ജിംഗ്: ചൈനയിലെ യുവാവിന്റെ ജീവിതത്തിൽ പറ്റിയ ഏറ്റവും വലിയ മണ്ടത്തരമായി മാറിയിരിക്കുകയാണ് വീട്ടിലെ വാഷിംഗ്‌ മെഷീൻ ശരിയാക്കാനായി മെഷീന്റെ ഉള്ളിൽ തലയിട്ടത്. തുടർന്ന് തല മെഷീന്റെ ഉളിൽ കുടുങ്ങി കിടന്നത് മണിക്കൂറുകളോളം.

ചൈനയിലെ ഫുജിയാൻ പ്രവിശ്യയിലാണ് സംഭവം നടന്നത്. വസ്ത്രം അലക്കുന്നതിനായി വാഷിംഗ് മെഷീൻ ഓണാക്കിയെങ്കിലും പ്രവർത്തിച്ചില്ല. തുടർന്ന് യുവാവ് മെഷീനുള്ളിൽ തല ഇട്ട് നോക്കുകയായിരുന്നു. ഉള്ളിൽ എന്തോ കുടുങ്ങി കിടക്കുന്നുണ്ട് എന്ന് കരുതിയാണ് യുവാവ് ഈ അവിവേകത്തിന് മുതിർന്നത്. പ്രശ്നം ഒന്നുമില്ലെന്ന് മനസിലാക്കിയ ശേഷം തല പുറത്തേക്ക് വലിച്ചപ്പോൾ തല ഉള്ളിൽ കുടുങ്ങുകയായിരുന്നു. തുടർന്ന് ഏറെ തവണ യുവാവ് തല പുറത്തേക്ക് എടുക്കാൻ ശ്രമിച്ചെങ്കിലും സാധിച്ചില്ല.

തുടർന്ന് മണിക്കൂറുകൾക്ക് ശേഷം വീട്ടിൽ താമസിക്കുന്ന മറ്റ് സുഹൃത്തുക്കൾ എത്തിയപ്പോഴാണ് കൂട്ടുകാരന്റെ ദയനീയ അവസ്ഥ കണ്ടത്. അവരും തല പുറത്ത് കൊണ്ടുവരാൻ ശ്രമിച്ചെങ്കിലും നടന്നില്ല. പിന്നീട് അഗ്നിശമന സേനയെ വിളിച്ച് വരുത്തുകയായിരുന്നു.

40 മിനിട്ടോളം നീണ്ട പ്രയത്നത്തിനൊടുവിലാണ് യുവാവിന്റെ തല പുറത്തെടുത്തത്. ഇതിനായി സേനാംഗങ്ങൾ മെഷീൻ കട്ടർ ഉപയോഗിച്ച് വാഷിങ് മെഷീൻ വെട്ടി പൊളിക്കുകയായിരുന്നു. എന്തായാലും തല പുറത്ത് എടുക്കുമ്പോഴെക്കും യുവാവ് അവശ നിലയിലായിരുന്നു.