രാമനാട്ടുകര: പുതുക്കോട് ശ്രീ കോട്ടക്കുറുംബാ ഭഗവതി ക്ഷേത്രത്തിലെ പുന:പ്രതിഷ്ഠാ – നവീകരണ കലശമഹോത്സവം 14 മുതല് 22 വരെ നടക്കും. മഹോത്സവത്തിന്റെ ഭാഗമായി വിശേഷാല് പൂജകള്, പ്രഭാഷണങ്ങള്, സാംസ്ക്കാരിക സമ്മേളനം, വിവിധ കലാപരിപാടികള് എന്നിവ നടക്കും. വിശേഷാല് പൂജകള്ക്ക് ക്ഷേത്രം തന്ത്രി ഇടവലത്ത് പുടയൂര്മന കുബേരന് നമ്പൂതിരിപ്പാട് മുഖ്യകാര്മ്മികത്വം വഹിക്കും.
പുന:പ്രതിഷ്ഠാ നവീകരണ കലശത്തോടനുബന്ധിച്ച് ഇന്നലെ വൈകീട്ട് അഞ്ചിന് നാമജപ വിളംബര ഘോഷയാത്ര നടന്നു. രാമനാട്ടുകര ശ്രീ പരിഹാരപുരം ക്ഷേത്ര സന്നിധിയില് നിന്നും ആരംഭിച്ച ഘോഷയാത്ര കോട്ടക്കുറുംബ ഭഗവതി ക്ഷേത്രത്തില് സമാപിച്ചു. എ. ഉണ്ണികൃഷ്ണന് നായര്, എം. ദാമോദരന് നായര്, എം. ഗോവിന്ദന് കുട്ടി മേനോന്, എം.കരുണാകരന് നായര്, കെ.പി. ശിവദാസന്, കെ. ലക്ഷ്മണന്, രഘുരാമന് തുടങ്ങിയവര് ഘോഷയാത്രയ്ക്ക് നേതൃത്വം നല്കി.
13 ന് വൈകീട്ട് മൂന്ന് മുതല് ക്ഷേത്രത്തില് കലവറ നിറയ്ക്കല് നടക്കും. 14 മുതല് 22 വരെയുള്ള ദിവസങ്ങളില് വിശേഷാല് പൂജകള് നടക്കും. 19 ന് പുലര്ച്ചെ 4.30 മുതല് 5.43 വരെയുള്ള മുഹൂര്ത്തത്തില് പ്രതിഷ്ഠ നടക്കും. വിവിധ ദിവസങ്ങളിലായി നടക്കുന്ന ആദ്ധ്യാത്മിക സാംസ്ക്കാരിക പരിപാടികളില് കേരള ക്ഷേത്ര സംരക്ഷണ സമിതി സംസ്ഥാന പ്രസിഡന്റ് സ്വാമി അയ്യപ്പദാസ്, ബിജെപി മുന് സം സ്ഥാന പ്രസിഡന്റ് അഡ്വ.പി.എസ്. ശ്രീധരന് പിള്ള, മാതൃസമിതി സംസ്ഥാന അദ്ധ്യക്ഷത പ്രൊഫ.വി.ടി. രമ, ബ്രഹ്മചാരി വിവേകാമൃത ചൈതന്യ, സുധീര് കടലുണ്ടി, സ്വാമി പരമാനന്ദപുരി, കേസരി ചീഫ് എഡിറ്റര് ഡോ. എന്.ആര്. മധു, നാഗര്കോവില് ശ്രീവനമാലീശ്വരന് കോവിലിലെ ശ്രീധര സ്വാമി തിരുവടികള് തുടങ്ങിയവര് പങ്കെടുക്കും.
