ഹരിപ്പാട്: കേരളത്തെ നടുക്കിയ വെടിക്കെട്ട് അപകടത്തില് നൂറിലധികം പേര് കൊല്ലപ്പെടുകയും നിരവധി ആള്ക്കാര്ക്ക് അംഗവൈകല്യം സംഭവിക്കുകയും പരിക്കേല്ക്കുകയും ചെയ്ത ദുരന്തത്തിന്റെ ധാര്മ്മിക ഉത്തരവാദിത്വം ഏറ്റെടുത്ത് ആഭ്യന്തരമന്ത്രി രമേശ് ചെന്നിത്തല രാജിവെയ്ക്കണമെന്ന് ബിജെപി ജില്ലാ പ്രസിഡന്റ് കെ. സോമന് ആവശ്യപ്പെട്ടു. മത്സര വെട്ടിക്കെട്ട് നടത്തുവാന് ജില്ലാ ഭരണകൂടം അനുമതി നിഷേധിച്ചിരുന്നു. എന്നാല് ചില കോണ്ഗ്രസ്സ് നേതാക്കന്മാരുടെ പിന്ബലത്തില് വെടിക്കെട്ട് മത്സരം നടത്തുവാന് ഉന്നത പോലീസ് ഉദ്യോഗസ്ഥര് അനുമതി നല്കിയത് ആഭ്യന്തരവകുപ്പിന്റെ വീഴ്ചയാണ്. പ്രദേശവാസികളുടെ പരാതി ഉണ്ടായിട്ടും അതില് വേണ്ടത്ര അന്വേഷണം പോലും നടത്താതെ കൊല്ലം പരവൂരിലെ ക്ഷേത്ര മൈതാനിയില് നിരവധി പാവപ്പെട്ടവരുടെ ജീവനെടുത്ത വെടിക്കെട്ട് അപകടത്തില് സമഗ്രമായ അന്വേഷണം നടത്തി പോലീസിനെതിരെ നടപടി സ്വീകരിക്കുവാന് മുഖ്യമന്ത്രിയും തയ്യാറാകണമെന്ന് ബിജെപി ആവശ്യപ്പെട്ടു.
















