കുണ്ടറ: ഭാരതീയ ജനതാ പാര്ട്ടി കുണ്ടറ നിയോജക മണ്ഡലം കമ്മിറ്റിയുടെ നേതൃത്വത്തില് എന്റെ കേരളം വികസന ചര്ച്ചയും വീഡിയോ കോണ്ഫറന്സിംഗും നടന്നു. സംസ്ഥാന നിയമസഭാ തെരഞ്ഞെടുപ്പുമായി ബന്ധപ്പെട്ടാണ് പാര്ട്ടിക്ക് തനതായ ഒരു വികസനനയം കേരളത്തില് രൂപീകരിക്കപ്പെടുന്നതിലേക്കുള്ള ചുവടുവയ്പ്പായ എന്റെ കേരളം പരിപാടി കുണ്ടറയില് സംഘടിപ്പിച്ചത്. കേരള ചരിത്രത്തില് ആദ്യമായിട്ടാണ് ഒരു രാഷ്ട്രീയപാര്ട്ടിയുടെ പ്രകടനപത്രിക ജനങ്ങള് തയ്യാറാക്കുന്നത്.
കേരളത്തിന്റെ വികസനത്തെ കുറിച്ചുള്ള സ്വപ്നങ്ങളും പ്രതീക്ഷകളും ജനങ്ങളുമായി പങ്കുവയ്ക്കുക എന്നതാണ് ഈ പദ്ധതി കൊണ്ട് ഉദേശിക്കുന്നത്. ബിജെപി സംസ്ഥാന പ്രസിഡന്റ് കുമ്മനം രാജശേഖരന് കുണ്ടറ മുക്കടയില് കുണ്ടറയുടെ വികസനസ്വപ്നങ്ങളെ കുറിച്ച് ജനങ്ങളുമായി സംവദിച്ചു. അത്യാധുനിക സാങ്കേതികവിദ്യകളുടെ സഹായത്തോടെ പത്തുദിവസം സംസ്ഥാനത്തെ 140 നിയോജക മണ്ഡലങ്ങളിലും പരിപാടി സംഘടിപ്പിച്ചു. ഒരു മണിക്കൂര് പൊതുചര്ച്ചയും, ഒന്നര മണിക്കൂര് കുമ്മനം രാജശേഖരനുമായി വീഡിയോ കോണ്ഫറന്സിംഗ് വഴി അഭിമുഖ സംഭാഷണവും നടന്നു. പൊതു ചര്ച്ചയില് അതാതു നിയോജകമണ്ഡലത്തിലെ ആറു പ്രമുഖ വ്യക്തികള് നിയോജകമണ്ഡലത്തിലെ പലവിധ വികസന വിഷയങ്ങളെ സംബന്ധിച്ചുള്ള നിര്ദ്ദേശങ്ങളും കാഴ്ച്ചപ്പാടുകളും അവതരിപ്പിച്ചു.
യുവാക്കളുടെയും സ്ത്രീകളുടെയും ഓരോ പ്രതിനിധികള് ചര്ച്ചയില് പങ്കെടുത്തു. വിദ്യാഭ്യാസം, തൊഴില്, വ്യാവസായികം, വൈദ്യുതി, കുടിവെള്ളം, ഗതാഗതം, ആരോഗ്യ പരിപാലനം, പൊതുവിഷയങ്ങള് തുടങ്ങിയവ ചര്ച്ചയില് അവതരിപ്പിച്ചു. ജില്ലയില് നടന്ന പരിപാടിയില് ഓരോ വാഹനത്തോടൊപ്പവും ഓരോ നിയോജകമണ്ഡലങ്ങള്ക്കും പ്രോഗ്രാം കോഡിനേറ്റര്, സഹകോഡിനേറ്റര്, പ്രോഗ്രാം അവതാരകന്, രണ്ട് ടെക്നീഷ്യന്മാര് എന്നിവരടക്കം അഞ്ചുപേരും ബിജെപി നിയോജക മണ്ഡലം ജനറല് സെക്രട്ടറിയും ഉണ്ടായിരുന്നു. ജില്ല കോഡിനേറ്റര് അഡ്വ.എന്.ചന്ദ്രമോഹന്, പി.എസ്.ഷാലു, പി.എസ്.അഭിജിത്ത്, സുകുമാരന് തുടങ്ങിയവര് നേതൃത്വം നല്കി.
