കോഴിക്കോട്: കോഴിക്കോട് സേവാഭാരതിയുടെ കീഴില് പ്രവര്ത്തിക്കുന്ന ബാലികാസദനത്തിന്റെ പതിനൊന്നാം വാര്ഷികവും സാമൂഹ്യ പ്രവര്ത്തകനായിരുന്ന വി.ആര്. നായനാരുടെ സ്മരണാര്ത്ഥമുള്ള ഗ്രന്ഥശാലയുടെ ഉദ്ഘാടനവും മാര്ച്ച് 20 ന് വൈകീട്ട് നാലിന് ചെറുവറ്റയിലുള്ള സേവാഭാരതി ബാലികാസദനത്തില് നടക്കും. കോഴിക്കോട് ജില്ലയില് സേവാഭാരതി നടത്തുന്ന നിരവധി സേവനപദ്ധതികളില് ഒന്നാണ് ബാലികാസദനം. കഴിഞ്ഞ ഒരു ദശകക്കാലമായി വാടകക്കെട്ടിടത്തില് പ്രവര്ത്തിച്ചിരുന്ന ബാലികാസദനം കഴിഞ്ഞ ഏപ്രില് മൂന്നിനാണ് സ്വന്തം കെട്ടിടത്തിലേക്ക് മാറിയത്. അനാഥരും അശരണരും വീട്ടിലെ പ്രതികൂല സാഹചര്യങ്ങളില് വഴിമുട്ടിയവരുമായ ബാലികമാര്ക്ക് അത്താണിയാണ് ഈ ബാലികാസദനം. കുട്ടികളുടെ സമ്പൂര്ണ്ണമായ വ്യക്തിത്വവികാസത്തിന് ഉതകുന്ന വിധത്തില് വിദ്യാഭ്യാസം നല്കി വളര്ത്തിയെടുക്കാനും സേവാഭാരതിയ്ക്ക് സാധിക്കുന്നുണ്ട്. ഇവിടെ 40 ബാലികമാര് അന്തേവാസികളായുണ്ട്. ഇതില് ഒരു പെണ്കുട്ടിയുടെ വിവാഹം മെയ് ഒന്നിന് ബാലികാസദനത്തില് നടക്കും.
വാരിക്കര രൈരുനായനാര് എന്ന വി.ആര്. നായനാര് അറിയപ്പെടുന്ന സാമൂഹ്യപ്രവര്ത്തകനായിരുന്നു. മാപ്പിള ലഹളകാലത്ത് അനാഥരായ കുഞ്ഞുങ്ങളെ സംരക്ഷിക്കാന് അദ്ദേഹം കോഴിക്കോട് എരഞ്ഞിപ്പാലത്ത് അനാഥമന്ദിരവും ബാലികാസദനവും ആരംഭിച്ചിരുന്നു. അദ്ദേഹത്തിന്റെ ഓര്മ്മയ്ക്കായി സേവാഭാരതി ബാലികാസദനത്തില് ആരംഭിക്കുന്ന ലൈബ്രറി ബാലികാസദനത്തിലെ കുട്ടികള്ക്കു മാത്രമല്ല,സമീപ പ്രദേശത്തെ സ്ത്രീകള്ക്കും കുട്ടികള്ക്കും അറിവുപകരാന് ഉദ്ദേശിച്ചാണ്.
20 ന് വൈകീട്ട് നാലിന് നടക്കുന്ന ചടങ്ങില് ചലച്ചിത്രതാരം ദേവന് ബാലികാസദനത്തിന്റെ വാര്ഷികാഘോഷം ഉദ്ഘാടനം ചെയ്യും. മാതൃഭൂമി മാനേജിംഗ് എഡിറ്റര് പി.വി. ചന്ദ്രന് ലൈബ്രറി ഉദ്ഘാടനവും വി.ആര്. നായനാരുടെ ഫോട്ടോ അനാച്ഛാദനവും നിര്വ്വഹിക്കും. കേസരി മുഖ്യപത്രാധിപര് ഡോ.എന്.ആര്. മധു. വി.ആര്. നായനാര് അനുസ്മരണ പ്രഭാഷണം നടത്തും. എരഞ്ഞിപ്പാലം നായനാര് ബാലികാസദനത്തില് ദീര്ഘകാലം മാതൃകാപരമായ സേവനം നടത്തിയ അമ്മിണിയമ്മയെ ഹേമലതാചന്ദ്രന് പൊന്നാടയണിയിച്ച് ആദരിക്കും. കുരുവട്ടൂര് ഗ്രാമപഞ്ചായത്ത് പ്രസിഡന്റ് അപ്പുക്കുട്ടന് മാസ്റ്റര്, ആര്എസ്എസ് കോഴിക്കോട് മഹാനഗര് സംഘചാലക് ഡോ.സി.ആര്. മഹിപാല്, എല്ഐസി സീനിയര് ഡിവിഷണല് മാനേജര് പി. രാധാകൃഷ്ണന്, ആര്ട്ടിസ്റ്റ് മദനന്, വി.ആര്. നായനാര് സ്മാരകസമിതി ജനറല്സെക്രട്ടറി സുകുമാര് കൂട്ടാളി എന്നിവര് ആശംസ നേരും. വൈകീട്ട് മൂന്ന് മുതല് താമരക്കാട് കൃഷ്ണന് നമ്പൂതിരിയും സംഘവും അവതരിപ്പിക്കുന്ന സംഗീതസപര്യയും ഉണ്ടായിരിക്കും. സേവാഭാരതി കോഴിക്കോട് അദ്ധ്യക്ഷന് ഡോ.പി. രാമകൃഷ്ണന്, ജനറല് സെക്രട്ടറി, എം.സി. ഷാജകുമാര്, ബാലികാസദനം സെക്രട്ടറി, സി. ഗംഗാധരന് വൈസ് പ്രസിഡന്റ് വൃന്ദാ രാഘവനുണ്ണി എന്നിവര് വാര്ത്താസമ്മേളനത്തില് പങ്കെടുത്തു.
