മാവൂര്: തെങ്ങിലക്കടവ് മുത്തശ്ശിക്കാവിലെ ഉത്സവത്തിനിടെ കല്ലേറ്. കല്ലേറില് ക്ഷേത്രശ്രീകോവിലിന്റെ ഓട് തകര്ന്നു. നിരവധിപേര്ക്ക് പരിക്കേറ്റു. സമീപവാസികളായ നാല് മുസ്ലിം സ്ത്രീകളാണ് കല്ലേറു നടത്തിയത്. പട്ടികജാതിക്കാരുടെ ഉടമസ്ഥതയില് ഉള്ള പുരാതനമായ മുത്തശ്ശിക്കാവില് പകല്പൂരം നടക്കുന്നത് കുംഭമാസം ഒന്നിനാണ്. ഇവിടുത്തെ പ്രധാനപ്പെട്ട നാല്പത്തിരണ്ടര വെള്ളാട്ട് നടക്കുന്നതിനിടെയാണ് അപ്രതീക്ഷമായി കല്ലേറുണ്ടായത്. അക്രമത്തില് പ്രതിഷേധിച്ച് ഭക്തജനങ്ങള് മാവൂര് കോഴിക്കോട് റോഡ് ഉപരോധിച്ചു. പോലീസ് നോക്കിനില്ക്കെ ഭക്തജനങ്ങള്ക്കും ക്ഷേത്രത്തിന് നേരെ കല്ലെറിയുകയും പട്ടികജാതിക്കാരെ അധിക്ഷേപിക്കുകയും ചെയ്തവര്ക്കെതിരെ നടപടി സ്വീകരിക്കണമെന്നാവശ്യപ്പെട്ടായിരുന്നു റോഡ് ഉപരോധം. അര മണിക്കൂറിലധികം നീണ്ട ഉപരോധത്തിനൊടുവില് മാവൂര് എസ്ഐ ടി.ശശിധരന് അക്രമം നടത്തിയ രണ്ട് സ്ത്രീകളെ അറസ്റ്റു ചെയ്തതിനെ തുടര്ന്നാണ് ഉപരോധം അവസാനിപ്പിച്ചത്.
വര്ഷങ്ങളായി ക്ഷേത്രത്തിനെതിരെ കയ്യേറ്റം നടക്കുകയാണ്. ക്ഷേത്രഭൂമിയായി 50 സെന്റ് സ്ഥലമുണ്ടായതില് ഇപ്പോള് മൂന്ന് സെന്റ് മാത്രമേ ഉള്ളൂ. കയ്യേറിയ സ്ഥലത്ത് വീടുകളും മറ്റും നിര്മ്മിച്ചുകഴിഞ്ഞു. ക്ഷേത്രഭൂമി കയ്യേറി കമ്പിവേലി സ്ഥാപിച്ചത് മുമ്പ് ക്ഷേത്രം ഊരായ്മക്കാര് പൊളിച്ചുമാറ്റിയിരുന്നു. പ്രദേശത്ത് സംഘര്ഷമുണ്ടാക്കാനും ക്ഷേത്രം തകര്ക്കുവാനും ഉത്സവം അലങ്കോലപ്പെടുത്താനുമുള്ള പ്രദേശത്തെ ചില തീവ്രവാദപ്രസ്ഥാനങ്ങളുടെ ഗൂഢാലോചനയാണ് സ്ത്രീകളെകൊണ്ട് അക്രമം നടത്തിച്ചതിന് പിന്നിലെന്നും ക്ഷേത്രഭൂമി തിരിച്ചുപിടിക്കുന്നതിന് തടസം നല്ക്കുന്നത് റവന്യൂ അധികൃതരാണെന്നും ക്ഷേത്രകമ്മിറ്റി ഭാരവാഹികള് ആരോപിച്ചു.
