പത്തനാപുരം: കിഴക്കന്മേഖല വരളുന്നു.വേനല്ക്കാലമാസമായ മാര്ച്ച്-ഏപ്രില് ആരംഭിക്കുന്നതിനുമുമ്പെ ജലാശയങ്ങളെല്ലാം വരണ്ടുകഴിഞ്ഞു. മലയോരമേഖലയിലും തോട്ടം മേഖലയിലും ഒരാഴ്ചയിലധികമായി ജലവിതരണവും ഭാഗികമായി നിലച്ചു.
അറ്റകുറ്റപണികളുടെ അഭാവം കാരണം ചെറുകിട ജലവിതരണപദ്ധിതികളെല്ലാം പ്രവര്ത്തനരഹിതമായിട്ട് മാസങ്ങളായി. ഇതിനിടെ പരിശോധനകളില്ലാതെ ജലവിതരണം നടത്തിയത് കാരണം കാലപഴക്കം ചെന്ന മിക്ക പൈപ്പുകളും പൊട്ടി വെള്ളം പാഴാകുകയാണ്. വനാതിര്ത്തിയിലും മറ്റും താമസിക്കുന്നവര് കിലോമീറ്ററുകള് നടന്ന് വെള്ളം ശേഖരിക്കേണ്ട അവസ്ഥയിലാണ്. പഞ്ചായത്തുകളുടെ മേല്നോട്ടത്തില് കഴിഞ്ഞവര്ഷം ടാങ്കറുകളില് ജലം എത്തിച്ചിരുന്നു. എന്നാല് ഇത്തവണ അതും ആരംഭിച്ചിട്ടില്ല. മഴ പെട്ടെന്നു നിലക്കുകയും ചൂട് വര്ദ്ധിക്കുകയും ചെയ്തതോടെ കാര്ഷികമേഖലയും ദുരിതത്തിലാണ്. ജനുവരിയില് തന്നെ കിണറുകളിലെ ജലനിരപ്പും താഴ്ന്ന് തുടങ്ങിയത് കനത്ത ജലക്ഷാമത്തിന് കാരണമാകുന്നുണ്ട്. തലവൂര്, പട്ടാഴി വടക്ക്, പിറവന്തൂര്, വിളക്കുടി, പത്തനാപുരം, പട്ടാഴി പഞ്ചായത്തുകളിലെ മിക്ക ഗ്രാമീണമേഖലകളിലും ജലക്ഷാമം വര്ദ്ധിച്ചിരിക്കുകയാണ്.
താലൂക്കില് സമ്പൂര്ണ്ണ കുടിവെള്ള വിതരണമെന്ന പ്രഖ്യാപനത്തെ തുടര്ന്ന് ആരംഭിച്ച വന്കിട ജലവിതരണപദ്ധതികളെല്ലാം പാതിവഴിയിലാണ്. പിറവന്തൂര്-പത്തനാപുരം ശുദ്ധജലവിതരണ പദ്ധതി മാത്രമാണ് ആകെ പ്രവര്ത്തിക്കുന്നത്. ഇതിലൂടെ രണ്ട് പഞ്ചായത്തുകളിലെ ജലവിതരണം മാത്രമേ സാധ്യമാകുന്നുള്ളൂ.
മറ്റുള്ള പഞ്ചായത്തുകള്ക്കും ശുദ്ധജലമെത്തിക്കാന് നിര്മ്മിച്ച പൂക്കുന്നിമല പദ്ധതി കമ്മീഷനായി കാത്തുകിടക്കാന് തുടങ്ങിയിട്ട് വര്ഷങ്ങളായി. വരുംനാളുകളില് ജലക്ഷാമം രൂക്ഷമാകും. അടിയന്തിരമായി ജലവിതരണം ആരംഭിക്കുവാനുള്ള നടപടി വേണമെന്നാവശ്യം ശക്തമായി.
