കൊട്ടാരക്കര: അംഗന്വാടി മാറ്റിയതിന്റെ പേരില് ശിശുക്ഷേമവികസന സമിതി ഓഫീസില് ഇടതു കൗണ്സിലര്മാരുടെ വിളയാട്ടം. ബിജെപി കൗണ്സിലറുടെ വാര്ഡായ അമ്മുമ്മമുക്കിലെ അംഗന്വാടി നീലേശ്വരത്തുള്ള വാടക കെട്ടിടത്തിലാണ് പ്രവര്ത്തിച്ചിരുന്നത്. പുതിയ കെട്ടിടം ലഭിച്ചതോടെ അമ്മുമ്മമുക്കിലേക്കു തന്നെ കഴിഞ്ഞദിവസം ഇതു മാറ്റിസ്ഥാപിച്ചു. ഈ കാരണം പറഞ്ഞ് നഗരസഭാ ഉപാധ്യക്ഷന് എ.ഷാജുവിന്െ നേതൃത്വത്തില് ഇടതു കൗണ്സിലര്മാര് ശിശുക്ഷേമവികസന ഓഫീസിലെത്തി ഏറെനേരം സംഘര്ഷം സൃഷ്ടിച്ചു. വനിതാ ജീവനക്കാര് എല്ലാം ഭയന്ന് വിറച്ചു. ജീവനക്കാരെ ‘സ്ഥലംമാറ്റുമെന്നും കാണിച്ച് തരുമെന്നും വൈകിയെത്തുന്ന ജീവനക്കാരെ പുറത്താക്കി ഓഫീസ് പൂട്ടുമെന്നായിരുന്നു ഇടത് സംഘടനാ നേതാവു കൂടിയായ കൗണ്സിലറുടെ ആക്രോശം. ഓഫീസില് നിന്നും പുറത്തുപോകാന് ഇറങ്ങിയ ജീവനക്കാരനെ തടഞ്ഞു നിര്ത്തി മര്ദ്ദിക്കാന് ശ്രമിച്ചു.
നീലേശ്വരത്ത് ഇടതുകൗണ്സിലര് ഉള്ളപ്പോള് ബിജെപി കൗണ്സിലറുടെ വാര്ഡിലേക്ക് അംഗന്വാടി കൊണ്ടുപോയതായിരുന്നു ഇടതന്മാരെയും പുതിയതായി ഇടതുപാളയത്തിലെത്തിയ പിള്ളവിഭാഗം സഖാക്കളേയും ചൊടിപ്പിച്ചത്. ഒരു മണിക്കൂറോളോളം ബഹളം കൂട്ടിയിട്ട് നീലേശ്വരത്തു തന്നെ അംഗന്വാടി തുടരണമെന്നാവശ്യപ്പെട്ട് സി.ഡി.പി.ഒക്ക് കത്തും നല്കി സംഘം പോകുകയും ചെയ്തു. മുമ്പ് 21-ാം നമ്പര് അംഗനവാടിയായിട്ടാണ് അമ്മുമ്മമുക്ക് വാര്ഡിലാണ് അംഗന്വാടി പ്രവര്ത്തിച്ചിരുന്നത്. പലസ്ഥലങ്ങളിലും മാറിമാറി പ്രവര്ത്തിച്ചിരുന്ന അംഗന്വാടി കുറച്ചുനാളുകളായി അമ്മുമ്മമുക്കിന്റെ തന്നെ ഭാഗമായിരുന്ന നീലേശ്വരത്തായിരുന്നു പ്രവര്ത്തനം. പഞ്ചായത്ത് നഗരസഭ ആയതോടെ അമ്മുമ്മമുക്കും നീലേശ്വരവും പ്രത്യേകം ഡിവിഷനുകളായി. ഇതോടെ അമ്മുമ്മമുക്കിലെ അംഗന്വാടി ഡിവിഷനില് തന്നെ സ്ഥാപിക്കണമെന്ന് ബിജെപി കൗണ്സിലറായ അമ്പിളി ഐ.സി.ഡി.എസ് ഉദ്യോഗസ്ഥര്ക്ക് നിവേദനം നല്കിയിരുന്നു.
റോഡരികില് പ്രവര്ത്തിക്കുന്ന അംഗന്വാടി സുരക്ഷാ കാരണത്താല് അവിടെ നിന്നും മാറ്റണമെന്ന് സി.ഡി.പി.ഒയും നിര്ദ്ദേശിച്ചിരുന്നു. ഇതിനെ തുടര്ന്നാണ് കഴിഞ്ഞദിവസം നീലേശ്വരത്തു നിന്നും അംഗന്വാടി അമ്മൂമ്മമുക്കിലേക്കു മാറ്റിയത്. ഇപ്പോള് നീലേശ്വരത്ത് ഇടതുകൗണ്സിലറായതകൊണ്ട് അംഗന്വാടി മാറ്റിയത് ബിജെപിയുടെ നേട്ടമായി ചിത്രീകരിക്കപെടുമോ എന്ന ഭയമാണ് ഇടതന്മാര്ക്ക്. വര്ഷങ്ങളായി പ്രവര്ത്തിക്കുന്ന അംഗനവാടിക്ക് ഇതുവരെ സ്വന്തമായി ഒരു കെട്ടിടം നിര്മ്മിക്കാന് കഴിയാത്തവരുടെ പ്രതിഷേധം എന്തിനുവേണ്ടിയാണന്നാണ് ജനം ചോദിക്കുന്നത്. അംഗന്വാടി വര്ക്കര്മാരുടെയും ഹെല്പ്പര്മാരുടെയും പരിശീലനം കോണ്ഗ്രസ് ഭവനിലെ ഹാളില് നടത്തിയിരുന്നതിനെയും നഗരസഭയിലെ ചില ഇടതുകൗണ്സിലര്മാര് എതിര്ത്ത് അവരെ വഴിയാധാരമാക്കിയിരുന്നു.
