കല്‍പ്പറ്റ:മൂന്നാമത്ത് സര്‍ഗ്ഗോത്സവ മത്സരങ്ങള്‍ക്ക് കൊടിയിറങ്ങുമ്പോള്‍ കാസര്‍ഗോഡ് ജി.എം.ആര്‍.എസിന് ഹാട്രിക്. 11 ഇന മത്സരങ്ങളില്‍ ഒന്നാം സ്ഥാനം കരസ്ഥമാക്കി 200 പോയിന്റുകള്‍ നേടിയാണ് കാസര്‍ഗോഡ് ആധിപത്യം നിലനിര്‍ത്തിയത്. 38 വിദ്യാര്‍ത്ഥികളും 10 അദ്ധ്യാപകരുമായി എത്തിയ കാസര്‍ഗോഡ് ടീം കഥാ- കവിതാ മത്സരങ്ങളില്‍ മികച്ച നേട്ടങ്ങളാണ് കരസ്ഥമാക്കിയത്. ജൂനിയര്‍ വിഭാഗം ഉപന്യാസം മലയാളം- ഇംഗ്ലീഷ്, സീനിയര്‍ വിഭാഗം ഉപന്യാസം മലയാളം- ഇംഗ്ലീഷ്, കവിതാ രചന മലയാളം, കവിതാ പാരായണം, മോണോ ആക്ട്, മിമിക്രി, ലളിതഗാനം, നാടോടി നൃത്തം(പെണ്‍കുട്ടികള്‍), നാടകം മലയാളം എന്നീ ഇനങ്ങള്‍ക്ക് ഒന്നാം സ്ഥാനം നേടിയാണ് കാസര്‍ഗോഡ് ചാമ്പ്യന്‍ പട്ടം നിലനിര്‍ത്തിയത്. കലോത്സവ നഗരിയില്‍ മാത്രം ഒതുങ്ങുന്നതല്ല ജി.എം.ആര്‍.എസി ലെ പെണ്‍കുട്ടികളുടെ കഴിവുകള്‍. കാസര്‍ഗോഡ് ജില്ലാ റവന്യൂ കായിക മേളയില്‍ രണ്ടാം സ്ഥാനം നേടി തങ്ങളുടെ വ്യക്തിമുദ്ര പതിപ്പിച്ചാണ് ഈ മിടുക്കികളുടെ വിജയ യാത്ര.
ഇവര്‍ സര്‍ഗ്ഗോത്സവത്തിലെ താരങ്ങള്‍
സര്‍ഗോത്സവത്തിന് തിരശ്ശീല വീഴുമ്പോള്‍ ഞാറാനീലി ഡോ. അംബേദ്ക്കര്‍ വിദ്യാനികേതന്‍ സി. ബി .എസ്.ഇ. സ്‌കൂളിലെ കെ. ജെ അഖിലയ്‌ക്ക് കലാതിലക പട്ടവും ഡോ. അംബേദ്ക്കര്‍ മെമ്മോറിയല്‍ ജി.എം.ആര്‍.എച്ച്.എസ്.എസ് നല്ലൂര്‍നാടിലെ അനൂജ് മാധവി കലാപ്രതിഭയുമായി. ചിന്തിപ്പിച്ചും ചിരിപ്പിച്ചും സര്‍ഗ്ഗോത്സവ വേദിയെ ഭാവസാന്ദ്രമാക്കിയ നാടകങ്ങള്‍ക്കൊടുവില്‍ ഭ്രാന്താശുപത്രിയിലെ രംഗങ്ങള്‍ക്ക് നര്‍മ്മത്തില്‍ പൊതിഞ്ഞ അന്തരീക്ഷം നല്‍കി ജാലകമെന്ന നാടകത്തില്‍ പ്രൊഫസറായി വേദിയിലെത്തിയ അഭിലാഷ് മികച്ച നടനായി. കണ്ണൂര്‍ ജി.എം.ആര്‍.എസ്സിലെ പ്ലസ് ടു ഹുമാനിറ്റീസ് വിദ്യാര്‍ത്ഥിയാണ്. കൊട്ടിയൂര്‍ സ്വദേശിയായ ബാബുവിന്റെയും സന്ധ്യയുടെയും മകനാണ്. വഴിതെറ്റി പോകുന്ന കുട്ടികളെ നല്ല വഴി കാണിക്കാന്‍ ശ്രമിക്കുന്ന ഐ.പി.എസ് ഓഫീസര്‍ രാജലക്ഷ്മി എന്ന ശക്തമായ കഥാപാത്രത്തെ അവതരിപ്പിച്ച് കാണികളുടെയും മന്ത്രി പി കെ ജയലക്ഷ്മി യുടെ പ്രത്യേക പ്രശംസയും നേടിയ ഷെറിന്‍ സുരേഷ് മികച്ച നടിയായി. പൈനാവ് ജി.എം.ആര്‍.എസിലെ എട്ടാം ക്ലാസ് വിദ്യാര്‍ത്ഥിനിയാണ്.
പ്രതികരിക്കാൻ ഇവിടെ എഴുതുക: