ധോര്ഡോ (ഗുജറാത്ത്):പോലീസ് ഉദ്യോഗസ്ഥര് ആധുനിക സാങ്കേതിക വിദ്യകള് പരമാവധി വിനിയോഗിക്കാന് തയ്യാറാകണമെന്ന് പ്രധാനമന്ത്രി നരേന്ദ്ര മോദി നിര്ദ്ദേശിച്ചു. സൂക്ഷ്മബോധവും അതിവേഗ പ്രതികരണവും സുരക്ഷാ സംവിധാനത്തിലെ അനിവാര്യതയാണെന്നും അദ്ദേഹം പറഞ്ഞു. ഗുജറാത്തിലെ കച്ചിലുള്ള ധോര്ഡോയില്, വിവിധ സംസ്ഥാനങ്ങളില്നിന്നുള്ള പോലീസ് ഡിജിപിമാരുടെ സമാപന യോഗത്തില് സംസാരിക്കുകയായിരുന്നു അദ്ദേഹം. മൂന്നുദിവസത്തെ യോഗത്തില് വിവിധ വിഷയങ്ങളില് കൂടിയാലോചനകള് നടന്നു.
യോഗത്തിലെ തീരുമാനങ്ങള് വിലയിരുത്തിയ പ്രധാനമന്ത്രി അവ അതിവേഗം നടപ്പാക്കണമെന്നു നിര്ദ്ദേശിച്ചു. സൂക്ഷ്മബോധവും അതിവേഗ പ്രതികരണവും പോലീസ് സേനയ്ക്ക് അനിവാര്യമായ ഘടകങ്ങളാണെന്നുപറഞ്ഞ അദ്ദേഹം സംവിധാനത്തില് അതികര്ക്കശമല്ലാത്ത ചട്ടക്കൂടുണ്ടാക്കണമെന്നും പറഞ്ഞു. അതുവഴിയേ സാധാരണക്കാരെ പോലീസുമായി കൂടുതല് അടുപ്പിക്കാന് കഴിയൂ. സാമാന്യ ജനതയുമായി പോലീസ് അടുക്കണം. അവരുടെ ആഘോഷങ്ങളില് പങ്കാളികളാകണം.
സൈബര് സുരക്ഷയും ഡിജിറ്റല് സാങ്കേതിക വിദ്യയും സാമൂഹ്യമാധ്യമങ്ങളും ശക്തിപ്രാപിക്കുമ്പോള് ഉദ്യോഗസ്ഥര് അവരുടെ ജോലികളില് സാങ്കേതികതയുടെ ഉപയോഗത്തിന് പ്രാധാന്യം നല്കണം. സംസ്ഥാനാതിര്ത്തികളിലെ ജില്ലകളിലുള്ള പോലീസ് ഉദ്യോഗസ്ഥര് തമ്മില് നല്ല ബന്ധവും ആശയ വിനിമയവുമുണ്ടാകണം.
പോലീസിന്റെ കര്ത്തവ്യങ്ങളില് ടൂറിസം പോലീസിങ്, ദുരന്താനുബന്ധ സേവനങ്ങള് തുടങ്ങിയവയും ഉള്പ്പെടണം. അര്പ്പണവും നിസ്വാര്ത്ഥതയും കര്ത്തവ്യബോധവുമുള്ളവരാണ് ദേശസുരക്ഷ കാക്കുന്ന പോലീസ് സേനയെന്നും പ്രധാനമന്ത്രി പ്രശംസിച്ചു. മികച്ച സേവനം ചെയ്തതിന് രാഷ്ട്രപതിയുടെ മെഡല് നേടിയ ഐബി ഓഫീസര്മാര്ക്ക് പ്രധാനമന്ത്രി അവ സമ്മാനിച്ചു. ആഭ്യന്തര മന്ത്രി രാജ്നാഥ് സിങ്, സഹമന്ത്രിമാരായ കിരണ് റിജ്ജു, ഹരിഭായ് പാര്ത്ഥിഭായ് ചൗധരി എന്നിവരും മുതിര്ന്ന ഉദേ്യാഗസ്ഥരും പങ്കെടുത്തു.
