ന്യൂദല്ഹി: നാഷണല് ഹെറാള്ഡ് കേസ് ഉള്പ്പെടെ ദിവസവും പുതിയ വിഷയങ്ങള് ഉയര്ത്തി രാജ്യസഭ സ്തംഭിപ്പിക്കുന്നത് അവസാനിപ്പിക്കാമെന്ന് സര്വ്വകക്ഷി യോഗത്തില് കോണ്ഗ്രസ് ഉറപ്പ് നല്കി. ഇതേ തുടര്ന്ന് തിങ്കളാഴ്ച മുതല് രാജ്യസഭ സാധാരണ നിലയില് പ്രവര്ത്തിക്കും. ആറോളം ബില്ലുകള് പാസാക്കാനും യോഗത്തില് ധാരണയായി.
എന്നാല് രാജ്യസഭയുടെ പരിഗണനയിലുള്ള ചരക്ക് സേവന നികുതി ബില് പാസാക്കുന്ന കാര്യത്തില് കോണ്ഗ്രസ് ഇതുവരെ അനുകൂല നിലപാട് സ്വീകരിച്ചിട്ടില്ല. 2016 ഏപ്രില് 1 മുതല് നടപ്പാക്കേണ്ട ജിഎസ്ടി വിഷയത്തില് കേന്ദ്രസര്ക്കാരിനെ അനുകൂലിക്കാനാവില്ലെന്ന നിലപാടില് തന്നെയാണ് കോണ്ഗ്രസ്. മറ്റ് പ്രതിപക്ഷ കക്ഷികള് ജിഎസ്ടി അടക്കമുള്ള എല്ലാ ബില്ലുകളിലും അനുകൂല നിലപാട് അറിയിച്ചിട്ടുണ്ട്. 23ന് ശീതകാല സമ്മേളനം സമാപിക്കും.
വിവിധ വിഷയങ്ങളുയര്ത്തി രാജ്യസഭ ദിവസങ്ങളായി സ്തംഭിച്ചതിനെ തുടര്ന്ന് അധ്യക്ഷന് ഹമീദ് അന്സാരിയാണ് ഇന്നലെ സര്വ്വകക്ഷി യോഗം വിളിച്ചത്. സഭാ നടപടികള് തടസ്സപ്പെടുത്തിയുള്ള പ്രതിഷേധങ്ങളെ പ്രതിപക്ഷത്തെ കോണ്ഗ്രസിതര പാര്ട്ടികളും എതിര്ത്തു. ഇതേ തുടര്ന്നാണ് തിങ്കള് മുതല് മൂന്നു ദിവസത്തേക്ക് പ്രതിഷേധം ഒഴിവാക്കാന് എല്ലാവരും ധാരണയിലെത്തിയത്.
എസ്.സി/എസ്.ടി പീഡന നിരോധന ഭേദഗതി നിയമം, അപ്രോപ്രിയേഷന് ബില്. ആന്റി ഹൈജാക്കിംഗ് ബില്, ആണവോര്ജ്ജ നിയമ ഭേദഗതി, സ്വകാര്യ കോടതി ഓര്ഡിനന്സ് ബില് എന്നിവ പാസാക്കാന് പ്രതിപക്ഷം സഹകരിക്കുമെന്നാണ് സര്വ്വകക്ഷി യോഗത്തിലെ ധാരണ. ജുവനൈല് നിയമ പ്രായപരിധി 18ല് നിന്നും 16 ആക്കി കുറയ്ക്കാനുള്ള ഭേദഗതി ബില് പാസാക്കുന്നതിനെ കോണ്ഗ്രസ് എതിര്ക്കുകയാണ്.
അരുണാചല് വിഷയമടക്കമുള്ള എന്തും സഭയില് ചര്ച്ച ചെയ്യാന് സജ്ജമാണെന്നും പ്രതിപക്ഷം സഭ നടത്താന് അനുവദിക്കാത്തതാണ് ചര്ച്ചകള് നടക്കാത്തതിന്റെ കാരണമെന്നും കേന്ദ്രസര്ക്കാര് പറഞ്ഞു.
അരുണാചല് വിഷയത്തില് ഇരുസഭകളിലും ഇന്നലെയും ബഹളം തുടര്ന്നു. ഉഭയലിംഗരതി നിയമവിധേയമാക്കണമെന്നാവശ്യപ്പെട്ട് ശശി തരൂര് എംപി കൊണ്ടുവന്ന സ്വകാര്യ ബില് ലോക്സഭ വോട്ടിനിട്ട് തള്ളിക്കളഞ്ഞു. സ്വകാര്യ ബില് അവതരണവേളയില്തന്നെ വോട്ടിനിട്ട് തള്ളുന്നത് അപൂര്വ്വമാണ്. 24നെതിരെ 71 വോട്ടുകള്ക്കാണ് ബില് ലോക്സഭ തള്ളിയത്. ബിജെപി അംഗം നിഷികാന്ത് ദുബെയുടെ എതിര്പ്പിനെ തുടര്ന്നാണ് അവതരണ വേളയില്തന്നെ ബില് വോട്ടിനിടാന് തീരുമാനിച്ചത്.
