ചേര്ത്തല: മതില് ഇടിഞ്ഞുവീണ് രണ്ട് പേര് മരിച്ച ദുരന്തവാര്ത്ത നഗരത്തെ ഞടുക്കി. വൈകിട്ട് സ്കൂള് വിടുന്ന സമയമായതിനാല് റോഡിലും തിരക്കായിരുന്നു. വിവരമറിഞ്ഞ് കൂടുതല്പേര് എത്തിയതോടെ എന്എസ്എസ് കരയോഗപരിസരമാകെ ജനനിബിഡമായി. കരയോഗം കെട്ടിടത്തിന്റെ ഇടുങ്ങിയ പ്രവേശനവഴിയിലൂടെ അകത്തേക്ക് കടക്കുവാന് പൊക്ളെയിന് ഏറെ പ്രയാസപ്പെട്ടു.
കെട്ടിടത്തിന്റെ മതിലിനൊപ്പം സമീപത്തെ വസ്തു ഉടമയുടെ മതിലും പൊളിച്ചാണ് പൊക്ളെയിന് അപകടസ്ഥലത്ത് എത്തിച്ചത്. മതിലിന്റെ അവശിഷ്ടങ്ങള് നീക്കി മൃതദേഹങ്ങള് പുറത്തെടുത്തപ്പോള് ഒരുമണിക്കൂറോളം വൈകിയിരുന്നു. കെട്ടിടത്തിനും മതിലിനോടും ചേര്ന്ന ഇടുങ്ങിയ സ്ഥലത്ത് ജനങ്ങളും തിങ്ങിനിറഞ്ഞത് രക്ഷാപ്രവര്ത്തനം വൈകുവാന് കാരണമായി. പോലീസാണ് ജനക്കൂട്ടത്തെ നിയന്ത്രിച്ചത്.
ചേര്ത്തല–ആലപ്പുഴ റോഡിലും ഗതാഗത തടസ്സമുണ്ടായി. മൃതദേഹം ആശുപത്രിയില് എത്തിച്ചതോടെ ഇവിടേക്കും നാട്ടുകാരുടെയും ബന്ധുക്കളുടെയും ഒഴുക്കായി.
നഗരസഭാധ്യക്ഷന് ഐസക്ക് മാടവന, വൈസ് ചെയര്പഴ്സണ് ശ്രീലേഖ നായര്, ഡപ്യൂട്ടി തഹസില്ദാര് എന്.യു ജോസഫ്, നഗരസഭ സൂപ്രണ്ട് എം.ആര്.ഉണ്ണിക്കൃഷ്ണന്, ചേര്ത്തല വടക്ക് വില്ലേജ് ഓഫീസര് എം.ജയശ്രീ, കെപിസിസി നിര്വാഹക സമിതിയംഗം സി.കെ.ഷാജിമോഹന്, കൗണ്സിലര്മാരായ ബി.ഭാസി, പി.ഉണ്ണിക്കൃഷ്ണന്, എം.ജയശങ്കര്, ബിജെപി മണ്ഡലം പ്രസിഡന്റ് പി.കെ. ബിനോയി, കോണ്ഗ്രസ് ബ്ളോക്ക് പ്രസിഡന്റ് സി.വി. തോമസ്, സിപിഎം നേതാക്കളായ കെ.പ്രസാദ്, ആര്.നാസര്, തുടങ്ങിയ നേതാക്കളും അപകടസ്ഥലത്തെത്തി.
ചേര്ത്തല ഡിവൈഎസ്പി സേവ്യര് സെബാസ്റ്റ്യന്, സിഐ വി.എസ്.നവാസ്, എസ്ഐ സോമനാഥ കൈമള്, അഗ്നിശമന സേന ലീഡിങ് ഫയര്മാന് പി.എ.ലിസാദ്, സ്റ്റേഷന് ഓഫീസര് സണ്ണി ചെറിയാന്, പി.പ്രഭാകരന്, പി.എസ്.ജോസഫ്, വി.ആര്.രാജേഷ്, പി.കെ.രജിമോന് എന്നിവര് നേതൃത്വം നല്കി.
