ചേര്ത്തല: താലൂക്കാശുപത്രിയില് അനര്ട്ടിന്റെ സഹായത്തോടെ നടപ്പാക്കുന്ന സൗരോര്ജ വൈദ്യുതീകരണ പദ്ധതി പൂര്ത്തിയായതായി പി. തിലോത്തമന് എംഎല്എ പറഞ്ഞു. ആസ്തി വികസന ഫണ്ടില് നിന്ന് 63 ലക്ഷം രൂപ ചെലവഴിച്ചാണ് പദ്ധതി യാഥാര്ഥ്യമാക്കിയത്. ഇതിലൂടെ പ്രതിമാസം ലക്ഷക്കണക്കിന് രൂപയുടെ സാമ്പത്തിക ലാഭം ആശുപത്രിക്ക് ലഭിക്കും. പദ്ധതിയുടെ ഉദ്ഘാടനം ഒക്ടോബര് രണ്ടിന് വൈകിട്ട് അഞ്ചിന് വൈദ്യുതി മന്ത്രി ആര്യാടന് മുഹമ്മദ് നിര്വഹിക്കും.
ആശുപത്രിയില് സമ്പൂര്ണ സൗരോര്ജ പാനല് സ്ഥാപിച്ചതിനെ തുടര്ന്ന് അനര്ട്ട് അധികൃതര് മറ്റൊരു സ്ഥാപനത്തില് സൗജന്യമായി പാനല് സ്ഥാപിച്ച് നല്കാമെന്ന് അറിയിച്ചിട്ടുണ്ടെന്നും കെഎസ്ആര്ടിസി യിലെ പുതിയ മന്ദിരത്തില് ഇത് സ്ഥാപിക്കുവാന് നിര്ദേശം നല്കിയതായും, ദേശീയ നിലവാരത്തിലുള്ള ആശുപത്രിയുടെ പ്രവര്ത്തനം സാധാരണക്കാര്ക്ക് പ്രയോജനമാകുന്ന തരത്തില് കൂടുതല് കാര്യക്ഷമമാക്കുവാന് ബന്ധപ്പെട്ടവര് തയ്യാറാകണമെന്നും എംഎല്എ പറഞ്ഞു.
ഹൃദയസംബന്ധമായ രോഗങ്ങള് മണ്ഡലത്തില് വ്യാപകമാകുന്ന സാഹചര്യത്തില് ഹൃദ്രോഗികള്ക്കായി 29 ന് രാവിലെ ഒന്പതിന് ഗാന്ധിബസാര് ഷോപ്പിങ് കോംപ്ലക്സിലെ സി.കെ.കുമാരപ്പണിക്കര് സ്മാരകത്തില് കാര്ഡിയാക് മെഡിക്കല് ക്യാമ്പ് സംഘടിപ്പിക്കും. ഹൃദ്രോഗ വിദഗ്ദന് ഡോ. കെ.എം. ചെറിയാന് ക്യാമ്പിന് നേതൃത്വം നല്കും.
വിഷന് 2030 ന്റെ ഭാഗമായി 30 ന് എന്എസ്എസ് യൂണിയന് ഓഡിറ്റോറിയത്തില് വികസന സെമിനാര് സംഘടിപ്പിക്കും. വൈകിട്ട് മൂന്നിന് നടക്കുന്ന ചടങ്ങില് വിവിധ മേഖലകളില് മികച്ച പ്രകടനം കാഴ്ചവെച്ചവരെ ആദരിക്കും. തദ്ദേശ സ്വയംഭറണ സ്ഥാപനങ്ങളുടെയും വിവിധ സംഘടനകളുടെയും ആഭിമുഖ്യത്തിലാണ് സ്വീകരണം ഒരുക്കിയിട്ടുള്ളത്.
