മാനന്തവാടി: വീട്ടമ്മമാരെ കബളിപ്പിച്ച് പണം തട്ടിമുങ്ങുന്ന യുവാവ് പോലീസ് പിടിയില്‍. കോഴിക്കോട് പൂവാട്ട് പറമ്പില്‍ മാതാട്ടില്‍ ദീപേഷാണ് അറസ്റ്റിലായത്. തെളിവെടുപ്പിന് ശേഷം പ്രതിയെ നാളെ കോടതിയില്‍ ഹാജരാക്കുമെന്ന് പൊലീസ് അറിയിച്ചു. പീഡനക്കേസില്‍ റിമാന്‍ഡില്‍ കഴിയുന്ന പ്രതിയെ മോചിപ്പിക്കുന്നതിനായി സി.ഐക്ക് പണം നല്‍കാനെന്ന് പറഞ്ഞ് പയ്യമ്പള്ളി സ്വദേശിനിയില്‍ നിന്ന് പണം തട്ടിയകേസിലാണ് ദീപേഷ് അറസ്റ്റിലായത്. കഴിഞ്ഞയാഴ്ചയാണ് സി.ഐ. പറഞ്ഞുവിട്ടയാളെന്ന് വീട്ടമ്മയെ ധരിപ്പിച്ച് ഇരുപതിനായിരത്തോളം രൂപ വാങ്ങിയത്. സംഭവത്തിന് ശേഷം ഇയാളെ വീട്ടമ്മ പലതവണ ഫോണില്‍ ബന്ധപ്പെടാന്‍ ശ്രമിച്ചെങ്കിലും ഫോണ്‍ സ്വിച്ച് ഓഫായിരുന്നു. ഇതേ തുടര്‍ന്ന് വീട്ടമ്മ പോലീസില്‍ പരാതി നല്‍കുകയായിരുന്നു. ദീപേഷിനെ കോഴിക്കോട് നിന്ന് വിളിച്ച് വരുത്തിയാണ് മാനന്തവാടി സി.ഐ. പി.എല്‍.ഷൈജു, എസ്.ഐ. വിനോദ് വലിയാട്ടൂര്‍ എന്നിവരുടെ നേതൃത്വത്തില്‍ അറസ്റ്റ് ചെയ്തത്. ചെന്നൈയില്‍ ഐടി മേഖലയില്‍ ജോലി ചെയ്യുന്നതായി പറയപ്പെടുന്ന ദീപേഷ് ആളുകളെ വഞ്ചിച്ച നിരവധി കേസുകളിലെ പ്രതിയാണെന്ന് പോലീസ് പറഞ്ഞു. ഇയാള്‍ക്കെതിരെ കോഴിക്കോട് നടക്കാവ്, ബത്തേരി സ്‌റ്റേഷനുകളിലായി ആറോളം ക്രിമിനല്‍ കേസുകള്‍ നിലനില്‍ക്കുന്നുണ്ട്. വെള്ളമുണ്ട സ്വദേശിനിയെ പീഡിപ്പിച്ച കേസിലും മറ്റൊരു സ്ത്രീയെ വഞ്ചിച്ച കേസിലും ജയില്‍ ശിക്ഷ അനുഭവിച്ചിട്ടുണ്ട്. ഉന്നത ബന്ധങ്ങളുള്ളതായി പറഞ്ഞ് വിശ്വസിപ്പിച്ച് ആളുകളെ സമര്‍ത്ഥമായി കബളിപ്പിക്കുന്നതാണ് ദീപേഷിന്റെ രീതിയെന്ന് പോലീസ് പറഞ്ഞു. തെളിവെടുപ്പിന് ശേഷം പ്രതിയെ ഇന്ന് കോടതിയില്‍ ഹാജരാക്കും.
Friday, January 10, 2025
വീട്ടമ്മമാരെ കബളിപ്പിച്ച് പണം തട്ടി മുങ്ങുന്ന യുവാവ് പിടിയില്‍
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
പ്രതികരിക്കാൻ ഇവിടെ എഴുതുക: