കൊച്ചി: ആസിഫ് അലി നായകനാകുന്ന ‘കോഹിനൂര്‍’ലെ ഗാനങ്ങള്‍ റിലീസ് ചെയ്തു. രണ്ട് ഗാനങ്ങളാണ് സിനിമയിലുള്ളത് വിജയ് യേശുദാസ് ആലപിച്ച ‘ഹേമന്തമെന്‍’നും, വിനീത് ശ്രീനിവാസന്‍ പാടിയ ‘ഡും ഡും ഡും’മും. ഹരിനാരായണന്‍ ബി.കെ.യുടെ വരികള്‍ക്ക് രാഹുല്‍ രാജാണ് ഈണം പകര്‍ന്നിരിക്കുന്നത്.
കോഹിനൂരിന്റെ ഓഡിയോ ലോഞ്ച് ചടങ്ങ് കഴിഞ്ഞ ചൊവാഴ്ച കൊച്ചിയില്‍ നടന്നിരുന്നു. നടന്‍ മമ്മൂട്ടിയും സിബി മലയിലും ചേര്‍ന്ന് സിഡി പ്രകാശനം ചെയ്താണ് ഓഡിയോ ലോഞ്ച് നിര്‍വ്വഹിച്ചത്. മലയാള സിനിമാ രംഗത്തെ പ്രമുഖ മ്യൂസിക് ലേബലായ Muzik247 ആണ് ഗാനങ്ങള്‍ റിലീസ് ചെയ്തിരിക്കുന്നത്.
നൊസ്റ്റാള്‍ജിയ മെലഡിയായ ‘ഹേമന്തമെന്‍’ ഗാനത്തിന് വന്‍ പ്രതികരണമാണ് ലഭിച്ചിട്ടുളത്. ഗാനത്തിന്റെ വീഡിയോ യൂട്യൂബില്‍ റിലീസ് ചെയ്ത് ആദ്യ മൂന്ന് ദിവസങ്ങള്‍ക്കുള്ളില്‍ ഒരു ലക്ഷത്തിലധികം പേരാണ് കണ്ടത്.
കൊഹിനൂരിലൂടെ അസിഫ് അലി സിനിമ നിര്‍മ്മാണരംഗത്തിലേക്ക് ചുവട് വയ്‌ക്കുകയാണ്. കൂട്ടുകാരായ സജിന്‍ ജാഫറിന്റെയും ബ്രിജിഷ് മുഹമ്മദിന്റെയും കൂടെ ചേര്‍ന്നാണ് ‘ആദംസ് വേള്‍ഡ് ഓഫ് ഇമാജിനേഷന്‍’ന്റെ ബാനറില്‍ ഈ സിനിമ നിര്‍മ്മിച്ചിട്ടുള്ളത്.
വിനയ് ഗോവിന്ദ് സംവിധാനം നിര്‍വ്വഹിച്ചിട്ടുള്ള കോഹിനൂരിന്റെ കഥ, തിരകഥ, സംഭാഷണം എന്നിവ ഒരുക്കിയിരിക്കുന്നത് സലില്‍ മേനോനും രഞ്ജിത്ത് കമല ശങ്കറുമാണ്. അസിഫ് അലിയും അപര്‍ണ്ണ വിനോദും മുഖ്യ കഥാപാത്രങ്ങളായി അഭിനയിക്കുന്ന ഈ സിനിമയില്‍ ഇന്ദ്രജിത്ത് സുകുമാരന്‍, അജു വര്‍ഗീസ്, സണ്ണി വെയ്ന്‍, വിനയ് ഫോര്‍ട്ട്, ചെമ്പന്‍ വിനോദ് എന്നിവരും താരനിരയില്‍ അണിനിരക്കുന്നു.
സെപ്തംബര്‍ 24ന് കോഹിനൂര്‍ തിയേറ്ററുകളില്‍ എത്തും.
പ്രതികരിക്കാൻ ഇവിടെ എഴുതുക: