ബസ് നിയന്ത്രണംവിട്ട് നാല് കുരുന്നുകള്‍ക്ക് പരിക്ക്

തൊടുപുഴ: വെള്ളിയാമറ്റത്ത് സ്‌കൂള്‍ കുട്ടികളുമായി പോയ ബസ് തിട്ടയിലിടിച്ച് മറിഞ്ഞു. നാല് കുരുന്നുകള്‍ക്ക് പരിക്കേറ്റു. അറക്കുളം സെന്റ് മേരീസ് എച്ച്എസ്എസിലെ അമീഷ, ആന്‍മരിയ, മൂലമറ്റം എസ്എച്ച്ഇഎംഎച്ച്എസിലെ ജസ്മരിയ, കാതറിന്‍ എന്നിവര്‍ക്കാണ് പരിക്കേറ്റത്. ഇന്നലെ വൈകിട്ട് കുട്ടികളുമായി പോയ വാഹനം വെള്ളിയാമറ്റം തൊണ്ണൂറ്റിനാലില്‍ വച്ച് നിയന്ത്രണം വിട്ട് തിട്ടയില്‍ ഇടിക്കുകയായിരുന്നു. വാഹനത്തിന്റെ ബ്രേക്ക് നഷ്ടപ്പെട്ടതാണ് അപകടകാരണം.പരിക്കേറ്റവരെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ആരുടേയും പരിക്ക് ഗുരുതരമല്ല. കാഞ്ഞാര്‍ എസ്.ഐയുടെ നേതൃത്വത്തിലുള്ള പോലീസ് സംഘവും നാട്ടുകാരും ചേര്‍ന്നാണ് പരിക്കേറ്റവരെ ആശുപത്രിയിലെത്തിച്ചത്.