തോട്ടപ്പള്ളി: തോട്ടപ്പള്ളി ഫിഷിങ് ഹാര്ബറിലെ മത്സ്യഫെഡിന്റെ ഔട്ട്ബോര്ഡ് എഞ്ചിന് വര്ക്ഷോപ്പ് അടച്ചൂപൂട്ടി. വാറണ്ടിയോടെ തൊഴിലാളികള്ക്ക് നല്കുന്ന എഞ്ചിന് നന്നാക്കാനുള്ള ഷോപ്പാണ് പൂട്ടിയത്. ഇതോടെ എഞ്ചിനുകള് നന്നാക്കുന്നതിന് തൊഴിലാളികള്ക്ക് സ്വകാര്യ വര്ക്കുഷോപ്പുകളെ ആശ്രയിക്കണം.
ആയിരക്കണക്കിന് മത്സ്യത്തൊഴിലാളികള്ക്ക് ആശ്രയമാകേണ്ട തോട്ടപ്പള്ളി ഫിഷിങ് ഹാര്ബറിനെ സംസ്ഥാന സര്ക്കാര് അവഗണിച്ചിരിക്കെയാണ് മത്സ്യഫെഡും ഇവര്ക്ക് ഇരുട്ടടി നല്കിയത്. നിലവില് മത്സ്യബന്ധനത്തിന് പോകുന്ന വള്ളങ്ങള്ക്ക് ഔട്ട്ബോഡ് എഞ്ചിന് നല്കുന്നത് മത്സ്യഫെഡാണ്. ലക്ഷങ്ങള് വിലയീടാക്കി യമഹ, സുസുക്കി എന്നീ എഞ്ചിനുകളാണ് ഇവര്ക്കു ആറുമാസത്തെ വാറണ്ടിയോടെ നല്കുന്നത്. ഇതനുസരിച്ച് പണിക്കിടെ കേടുപാടുകള് സംഭവിക്കുമ്പോള് എഞ്ചിനുകള് നന്നാക്കാന് 1990ലാണ് മത്സ്യഫെഡ് ജില്ലയിലെ ആദ്യത്തെ വര്ക്ക്ഷോപ്പ് പുറക്കാട് പഞ്ചായത്തില് ആരംഭിച്ചത്. നിലവില് സ്വന്തമായി കെട്ടിടമില്ലാത്തിനാല് പുറക്കാട്, ആനന്ദേശ്വരം എന്നീ ഭാഗങ്ങളില് വാടക കെട്ടിടങ്ങളിലായിരുന്നു ഇവ പ്രവര്ത്തിച്ചിരുന്നത്. പിന്നീട് ഹാര്ബറിലെ കെട്ടിടത്തിലേക്ക് മത്സ്യഫെഡ് വര്ക്ക്ഷോപ്പ് മാറ്റുകയായിരുന്നു.
നാലോളം ജീവനക്കാരെ താത്കാലികമായി നിയമിച്ച് എഞ്ചിന്റെ സ്പെയര് പാര്ട്സുകള് കുറഞ്ഞവിലയ്ക്ക് നല്കി എഞ്ചിനുകള് നന്നാക്കി നല്കുകയായിരുന്നു ലക്ഷ്യം. ഇതോടെ ജില്ലയിലെ തീരദേശ പഞ്ചായത്തുകളില് നിന്നും എഞ്ചിനുകള് ഇവിടെ എത്തിച്ചായിരുന്നു നന്നാക്കിയിരുന്നത്. ഇത്തരത്തില് മത്സ്യത്തൊഴിലാളികള്ക്ക് പ്രയോജനപ്പെട്ടിരുന്ന വര്ക്ക്ഷോപ്പാണ് യാതൊരു മുന്നറിയിപ്പുമില്ലാതെ മാസങ്ങള്ക്കു മുമ്പ് പൂട്ടിയത്.
സ്വകാര്യ വര്ക്ക്ഷോപ്പുകാരെ സഹായിക്കാനാണ് വര്ക്ക്ഷോപ്പ് അടച്ചുപൂട്ടിയതെന്നും ആക്ഷേപമുയര്ന്നിട്ടുണ്ട്. വര്ക്ക്ഷോപ്പ് പൂട്ടിയതോടെ കേടായി എത്തുന്ന എഞ്ചിനുകള് ഇരട്ടി തുക ഓട്ടോക്കൂലി നല്കി കൊല്ലത്തുവരെ എത്തിച്ച് നന്നാക്കേണ്ട അവസ്ഥയിലാണ് തൊഴിലാളികള്.
