കൊച്ചി: നീര ഉത്പാദിപ്പിക്കുന്ന നാളികേര കര്‍ഷകരോട് സര്‍ക്കാര്‍ കാട്ടുന്ന അവഗണനയിലും വാഗ്ദാന ലംഘനത്തിലും പ്രതിഷേധിച്ച് നാളികേര വികസന ബോര്‍ഡിനു കീഴില്‍ പ്രവര്‍ത്തിക്കുന്ന ഉത്പാദക കമ്പനികളുടെ കൂട്ടായ്മയായ കണ്‍സോര്‍ഷ്യം ഓഫ് കോക്കനട്ട് പ്രൊഡ്യൂസര്‍ കമ്പനീസ് ഇന്‍ കേരള മെയ് 11 ന് കളക്ട്രേറ്റ് ധര്‍ണ്ണയും, 18 മുതല്‍ സെക്രട്ടറിയേറ്റ് പടിക്കല്‍ അനിശ്ചിതകാല നിരാഹാര സമരവും നടത്തും.
നീര സംഭരണവും സംസ്‌കരണവും നടത്തുന്നതിന് 2013-14 ബഡ്ജറ്റില്‍ വകയിരുത്തിയ 15 കോടി രൂപയുടെ ഗ്രാന്റ്, പ്ലാന്റ് നിര്‍മ്മാണം പൂര്‍ത്തിയാക്കുന്ന മുറയ്‌ക്ക് കമ്പനികള്‍ക്ക് കൈമാറുമെന്നാണ് സര്‍ക്കാര്‍ പ്രഖ്യാപിച്ചിരുന്നത്. 2015 ഫെബ്രുവരി 26-ന് കൊല്ലം കൈപ്പുഴ കമ്പനിയുടെ പ്ലാന്റ് ഉദ്ഘാടന വേളയില്‍ നീരയ്‌ക്കായി മാറ്റി വെച്ച തുക മാര്‍ച്ച് 30-ന് അകം നല്‍കുമെന്ന വാഗ്ദാനം നല്‍കി. എന്നാല്‍ വാഗ്ദാനലംഘനം തുടരുകയും ഈ തുക ലാപ്‌സാവുകയും ചെയ്ത സാഹചര്യത്തിലാണ് കണ്‍സോര്‍ഷ്യം സമരത്തിനിറങ്ങുന്നതെന്ന് ചെയര്‍മാന്‍ ഷാജഹാന്‍ കാഞ്ഞിരവിളയില്‍ അറിയിച്ചു.
ആവശ്യങ്ങള്‍ അംഗീകരിക്കാത്ത പക്ഷം മെയ് 18 മുതല്‍ തിരുവനന്തപുരത്ത് സെക്രട്ടേറിയറ്റിനു മുന്നില്‍ കേരളത്തിലെ എല്ലാ നാളികേര ഉത്പാദക ഫെഡറേഷന്റെ ഭാരവാഹികളും, കമ്പനികളുടെ ചെയര്‍മാന്മാരും നേതൃത്വം നല്‍കുന്ന അനിശ്ചിതകാല നിരാഹാര സമരം ആരംഭിക്കും.
2014-15 ബജറ്റില്‍ നീരയ്‌ക്കായി അനുവദിച്ച 30 കോടി രൂപ അടിയന്തരമായി നാളികേര വികസന ബോര്‍ഡിന് കീഴില്‍ രൂപീകരിച്ച പ്രൊഡ്യൂസര്‍ കമ്പനികള്‍ക്ക് നല്‍കുക, നീര ലൈസന്‍സിന് അപേക്ഷിച്ച മുഴുവന്‍ ഫെഡറേഷനുകള്‍ക്കും ലൈസന്‍സ് നല്‍കുക, പച്ചത്തേങ്ങ, കൊപ്ര സംഭരണത്തിന് ഫെഡറേഷനുകള്‍ക്കും കമ്പനികള്‍ക്കും റീവോള്‍വിംഗ് ഫണ്ട് അനുവദിക്കുക, സര്‍ക്കാര്‍ അധീനതയിലുളള പുറംപോക്ക് ഭൂമി ഉത്പാദക കമ്പനികള്‍ക്കും ഫെഡറേഷനുകള്‍ക്കും പദ്ധതികള്‍ നടപ്പിലാക്കാന്‍ വിട്ടുനല്‍കുക തുടങ്ങിയ ആവശ്യങ്ങള്‍കൂടി ഉന്നയിച്ചാണ് കമ്പനികള്‍ പ്രക്ഷോഭത്തിലേയ്‌ക്ക് നീങ്ങുന്നത്.
പ്രതികരിക്കാൻ ഇവിടെ എഴുതുക: