ആലപ്പുഴ: അമ്പലപ്പുഴ നിയോജക മണ്ഡലത്തിലെ വിവിധ പ്രദേശങ്ങളിലെ കുടിവെള്ള ക്ഷാമം അടിയന്തരമായി പരിഹരിക്കണമെന്ന് ജി. സുധാകരന്‍ എംഎല്‍എ ആവശ്യപ്പെട്ടു. മണ്ഡലത്തിലെ തൂക്കുകുളം, അമ്പലപ്പുഴ, തോട്ടപ്പള്ളി പ്രദേശങ്ങളിലെ വെല്ലുകള്‍ തകരാറിലാണ്. അമ്പലപ്പുഴ തെക്ക്, വടക്ക് പഞ്ചായത്തുകളിലെ തീരപ്രദേശങ്ങളില്‍ ദിവസങ്ങളോളമായി കുടിവെള്ളം ലഭിക്കുന്നില്ല. തൂക്കുകുളത്തിന്റെ പരിസര പ്രദേശങ്ങളില്‍ കുടിവെള്ളം ലഭിക്കുന്നില്ല.
അതുപോലെ ആലപ്പുഴ നഗരസഭയുടെ കിഴക്കന്‍ പ്രദേശങ്ങളില്‍ മാസങ്ങളോളമായി കുടിവെള്ളം ലഭിക്കുന്നില്ല. കരാറുകാര്‍ക്ക് വര്‍ഷങ്ങളായി പണം നല്‍കാത്തതിനാല്‍ അറ്റകുറ്റപ്പണി നടത്തുന്നില്ല. സര്‍ക്കാര്‍ നല്‍കിയ കുറച്ച് കുടിശികപ്പണം ആറുമാസമായി പാസായിട്ടും ബന്ധപ്പെട്ട ഉദ്യോഗസ്ഥര്‍ നല്‍കുന്നില്ലെന്ന ആക്ഷേപവുമുണ്ട്. അടിയന്തരമായി മണ്ഡലത്തിലെ കുടിവെള്ള പ്രശ്‌നം പരിഹരിച്ചില്ലെങ്കില്‍ ശക്തമായ സമരം സംഘടിപ്പിക്കുമെന്ന് എംഎല്‍എ അറിയിച്ചു.
പ്രതികരിക്കാൻ ഇവിടെ എഴുതുക: