ആലപ്പുഴ: ആര്യാട് കൈതത്തില്‍ ഭാഗത്ത് ആര്‍എസ്എസ് പ്രവര്‍ത്തകരുടെ വീടുകള്‍ തകര്‍ക്കുകയും കൈതത്തില്‍ ക്ഷേത്രോത്സവത്തിനിടെ ആര്‍എസ്എസ് പ്രവര്‍ത്തകരെ അക്രമിക്കുകയും ചെയ്ത സിപിഎം ക്വട്ടേഷന്‍ സംഘം ‘സോക്കറി’ല്‍ അംഗങ്ങളായ നാലുപേരെ നോര്‍ത്ത് സിഐ: ബാബുവിന്റെ നേതൃത്വത്തില്‍ പിടികൂടി.
ആര്യാട് നാലാം വാര്‍ഡ് നികര്‍ത്തില്‍ സാബു സത്യന്‍ (മാവോ ബിജു-34), മൂന്നാം വാര്‍ഡ് ബിജു ഭവനില്‍ വിനീത് ജോണ്‍, സഹോദരന്‍ വിജു ജോണ്‍, രണ്ടാം വാര്‍ഡ് തൈപ്പറമ്പില്‍ ജോസ് സെബാസ്റ്റിയന്‍ (22) എന്നിവരെയാണ് പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
കഴിഞ്ഞ അഞ്ചിനാണ് ആര്‍എസ്എസ് പ്രവര്‍ത്തകരായ ആര്യാട് കൈതത്തില്‍ നികര്‍ത്തില്‍ ബിനു, കൈതത്തില്‍ കണ്ടത്തില്‍ രതീഷ് എന്നിവരുടെ വീടുകള്‍ ക്വട്ടേഷന്‍ സംഘം തകര്‍ത്തത്. ഇതേ സംഘം കഴിഞ്ഞ 29ന് ആര്യാട് ക്ഷേത്രത്തിലെ ഉത്സവത്തിനിടെ ആര്‍എസ്എസ് പ്രവര്‍ത്തകരെ അക്രമിച്ചിരുന്നു. മറ്റു നിരവധി ക്രിമിനല്‍ കേസുകളിലും ഇവര്‍ പ്രതികളാണ്. നേരത്തെ പോലീസുകാരെ അക്രമിച്ച കേസിലും ഇവര്‍ പ്രതികളായിരുന്നു.
മാവോ ബിജുവാണ് സംഘത്തെ നയിക്കുന്നത്. പണം പലിശയ്‌ക്ക് കൊടുക്കുന്ന ഇയാളാണ് ‘സോക്കര്‍’ എന്ന ക്വട്ടേഷന്‍ സംഘത്തിന് വേണ്ട സഹായങ്ങള്‍ നല്‍കിയിരുന്നത്. സിപിഎമ്മിലെ ചില മുതര്‍ന്ന നേതാക്കളാണ് ഈ സംഘത്തിന് ആവശ്യമായ സഹായങ്ങള്‍ ചെയ്തിരുന്നത്. സിപിഎമ്മിന് വേണ്ടി പല സ്ഥലങ്ങളിലും ക്വട്ടേഷന്‍ അക്രമങ്ങള്‍ക്ക് പോയിരുന്നത് ഈ സംഘമാണെന്ന് പറയപ്പെടുന്നു.
പ്രതികരിക്കാൻ ഇവിടെ എഴുതുക: