മണ്ണഞ്ചേരി: ക്ഷേത്രോത്സവത്തിനിടെ പോലീസിന് നേരെ അക്രമണം എസ്‌ഐക്കും രണ്ട് പോലീസുകാര്‍ക്കും പരിക്ക്. അക്രമികളായ രണ്ടുപേരെ പിടികൂടി, ഒരാള്‍ ഓടി രക്ഷപ്പെട്ടു. മണ്ണഞ്ചേരി എസ്‌ഐ: സുധീര്‍ മനോഹര്‍, സിപിഒമാരായ സജുസത്യന്‍, ബിനു എന്നിവര്‍ ചെട്ടികാട് കമ്മ്യൂണിറ്റി ഹെല്‍ത്ത് സെന്ററില്‍ ചികിത്സ തേടി.
ശനിയാഴ്ച അര്‍ദ്ധരാത്രിയില്‍ കാട്ടൂര്‍ പുതിയവീട്ടില്‍ ഹനുമല്‍ ക്ഷേത്രത്തില്‍ ഗാനമേളയ്‌ക്കിടെ മദ്യപിച്ചെത്തിയ ഒരു സംഘം യുവാക്കളാണ് പരസ്പരം പോര്‍വിളി നടത്തി ഭികരാന്തരീക്ഷം സൃഷ്ടിച്ചത്. ഇവരോട് ക്ഷേത്രമൈതാനിയില്‍ നിന്ന് പിരിഞ്ഞു പോകാന്‍ പോലീസ് ആവശ്യപ്പെടുകയും നിയന്ത്രിക്കാന്‍ ശ്രമിക്കുകയും ചെയ്തപ്പോള്‍ ഇതില്‍ പ്രകോപിതനായ യുവാവിനെ പൊലീസ് ജീപ്പില്‍ കയറ്റാന്‍ ശ്രമിക്കവേ എസ്‌ഐയെ വളഞ്ഞുവച്ച് അക്രമിക്കുകയായിരുന്നു. ഇത് തടയാനെത്തിയ പോലീസുകാരെയും അക്രമിച്ചു.
പോലീസിന്റെ കൃത്യനിര്‍വഹണം തടസപ്പെടുത്തുകയും അക്രമണം നടത്തുകയും ചെയ്ത മാരാരിക്കുളം തെക്ക് പഞ്ചായത്ത് 19-ാം വാര്‍ഡ് തെക്കേപുരയ്‌ക്കല്‍ വീട്ടില്‍ നിഖില്‍ (കണ്ണന്‍-25), മാരാരിക്കുളം തെക്ക് പഞ്ചായത്ത് 20-ാം വാര്‍ഡ് പടിഞ്ഞാറേ പീടികയില്‍ ബെന്നി (20) എന്നിവരെ സംഭവസ്ഥലത്ത് നിന്നും പോലീസ് പിടികൂടി. ഓടി രക്ഷപ്പെട്ട യുവാവിനായി പോലീസ് അന്വേഷണം ഊര്‍ജിതമാക്കി. പിടിയിലായ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: