കൊച്ചി: കൊക്കെയ്ന്‍ കേസില്‍ ജാമ്യംനേടി നടന്‍ ഷൈന്‍ ടോം ചാക്കോ വീണ്ടും കാമറയ്‌ക്കുമുന്നിലെത്തി. ജയരാജ് വിജയന്‍ സംവിധാനം ചെയ്യുന്ന ‘വിശ്വാസം, അതല്ലേ എല്ലാം’ എന്ന ചിത്രത്തിന്റെ മുടങ്ങിക്കിടന്ന ചിത്രീകരണമാണ് ഷൈനിന്റെ വരവോടെ ഇന്നലെ പുനരാരംഭിച്ചത്. കൊച്ചി മട്ടാഞ്ചേരിയിലാണ് ചിത്രത്തിന്റെ ഷൂട്ടിങ് നടക്കുന്നത്.
ഷൈനിന്റെ അറസ്റ്റിനെ തുടര്‍ന്ന് 62 ദിവസം ചിത്രത്തിന്റെ ഷൂട്ടിങ് നിര്‍ത്തിവച്ചിരിയ്‌ക്കുകയായിരുന്നു. ഷൈന്‍ തിരിച്ചുവന്നതോടെയാണ് ഈസ്റ്റര്‍ ദിനത്തില്‍തന്നെ ചിത്രീകരണം പുനരാരംഭിച്ചത്. ജോമോന്‍ എന്ന കഥാപാത്രത്തെയാണ് ചിത്രത്തില്‍ ഷൈന്‍ അവതരിപ്പിയ്‌ക്കുന്നത്.
സഹപ്രവര്‍ത്തകരെല്ലാം തനിയ്‌ക്ക് നല്ല പിന്തുണയാണ് നല്‍കുന്നതെന്നും അഭിനയരംഗത്ത് സജീവമാകുമെന്നും ഷൈന്‍ ടോം ചാക്കോ പറഞ്ഞു.
സിനിമ ഒരുതരത്തില്‍ ഷൈനിന് അറംപറ്റുകയായിരുന്നു. പ്രായോഗികത എന്തെന്നറിയാത്ത ചെറുപ്പക്കാരന്‍ ചതിക്കുഴികളില്‍ വീഴുന്നതാണു സിനിമയുടെ പ്രമേയം. ഷൈന്‍ അറസ്റ്റിലായ സമയത്ത് 90 ശതമാനത്തോളം ചിത്രീകരണവും പൂര്‍ത്തിയായിരുന്നു. 17 ദിവസംകൊണ്ടു ബാക്കി ചിത്രീകരണം പൂര്‍ത്തിയാകുമെന്നു സംവിധായകന്‍ പറഞ്ഞു.
പ്രതികരിക്കാൻ ഇവിടെ എഴുതുക: