റെക്കോര്‍ഡുകള്‍ ധോണിക്ക് സ്വന്തം

ഹാമില്‍ട്ടണ്‍: ഇന്ത്യന്‍ നായകന്‍ മഹേന്ദ്രസിംഗ് ധോണിക്ക് ഇന്നലെ രണ്ട് റെക്കോര്‍ഡുകള്‍ സ്വന്തം. ലോകകപ്പില്‍ ഏറ്റവും കൂടുതല്‍ വിജയം നേടിയ ക്യാപ്റ്റനും ഏകദിനത്തില്‍ ഏറ്റവും കൂടുതല്‍ മത്സരങ്ങളില്‍ ഇന്ത്യയെ നയിച്ച ക്യാപ്റ്റനെന്ന റെക്കോര്‍ഡുമാണ് ഇന്നലെ അയര്‍ലന്‍ഡിനെതിരായ വിജയത്തോടെ ധോണി സ്വന്തം പേരിലാക്കിയത്. കൂടാതെ ലോകകപ്പില്‍ തുടര്‍ച്ചയായി ഏറ്റവും കുടുതല്‍ മത്സരങ്ങളില്‍ വിജയിച്ച ഇന്ത്യന്‍ നായകനെന്ന ബഹുമതിയും ഇനി ധോണിക്ക് സ്വന്തം.

175 ഏകദിനത്തിലാണ് ധോണി ടീം ഇന്ത്യയെ ഏകദിനങ്ങളില്‍ നയിച്ചത്. 174 മത്സരങ്ങളില്‍ ക്യാപ്റ്റനായിരുനന മുഹമ്മദ് അസ്ഹറുദ്ദീനെയാണ് ധോണി ഇന്നലെ പിന്തള്ളിയത്. ജയത്തിന്റെ എണ്ണത്തിലും ധോണി അസ്ഹറുദ്ദീനെയാണ് പിന്തള്ളിയത്. അസ്ഹറുദ്ദീന്‍ നയിച്ച 174 മത്സരങ്ങളില്‍ 90 എണ്ണത്തില്‍ വിജയിച്ചപ്പോള്‍ ധോണി 175 കളികളില്‍ നിന്ന് 98 വിജയങ്ങളാണ് സ്വന്തമാക്കിയത്. ഇന്ത്യക്ക് ഏറ്റവും കൂടുതല്‍ ഏകദിന വിജയങ്ങള്‍ നേടിക്കൊടുത്ത നായകനും ധോണിയാണ്. 98 കളികളിലാണ് ധോണിയുടെ ചിറകിലേറി ഇന്ത്യ വിജയിച്ചിട്ടുള്ളത്. വിദേശമണ്ണില്‍ ടീം ഇന്ത്യയെ കൂടുതല്‍ ഏകദിന വിജയങ്ങളിലേക്ക് നയിച്ചതും ധോണിയാണ്.

ലോകകപ്പ് വിജയങ്ങളില്‍ കപില്‍ദേവിന്റെ പേരിലുള്ള 11 വിജയമെന്ന റെക്കോര്‍ഡാണ് ധോണി ഇന്നലെ തിരുത്തിയത്. ധോണിയുടെ നായകത്വത്തില്‍ ഇന്ത്യ 12 വിജയങ്ങളാണ് ഇതുവരെ ലോകകപ്പില്‍ സ്വന്തമാക്കിയിട്ടുള്ളത്. കപില്‍ദേവ് 15 മത്സരങ്ങളില്‍ നിന്നാണ് 11 വിജയം നേടിയതെങ്കില്‍ ധോണി 14 കളികളില്‍ നിന്ന് 12 വിജയം സ്വന്തമാക്കി. ഒരെണ്ണത്തില്‍ മാത്രമാണ് ധോണിയുടെ നേതൃത്വത്തില്‍ ടീം ഇന്ത്യ പരാജയപ്പെട്ടിട്ടുള്ളത്. 2011ലെ കഴിഞ്ഞ ലോകകപ്പില്‍ ദക്ഷിണാഫ്രിക്കക്കെതിരെ.

2011 മാര്‍ച്ച് 20ന് ചെന്നൈയില്‍ വെസ്റ്റിന്‍ഡീസിനെതിരെയാണ് ഇന്ത്യയുടെ ലോകകപ്പിലെ അപരാജിത കുതിപ്പിന് തുടക്കമിട്ടത്. തുടര്‍ന്ന് ക്വാര്‍ട്ടര്‍ ഫൈനലില്‍ ഓസ്‌ട്രേലിയയെയും സെമിയില്‍ പാക്കിസ്ഥാനയെും ഫൈനലില്‍ ശ്രീലങ്കയെയും തകര്‍ത്ത് ലോകകപ്പില്‍ മുത്തമിടുകയും ചെയ്തു. ഇത്തവണ തുടര്‍ച്ചയായ അഞ്ച് വിജയമാണ് ധോണിയും കൂട്ടരും ലോകകപ്പില്‍ ഇതുവരെ സ്വന്തമാക്കിയിട്ടുള്ളത്. പാക്കിസ്ഥാന്‍, ദക്ഷിണാഫ്രിക്ക, യു എഇ, വെസ്റ്റിന്‍ഡീസ്, അയര്‍ലന്‍ഡ് എന്നീ ടീമുകളാണ് ഇത്തവണ ഇന്ത്യക്ക് മുന്നില്‍ കീഴടങ്ങിയത്.

2003ലെ ലോകകപ്പില്‍ സിംബാബ്‌വെ, നമീബിയ, ഇംഗ്ലണ്ട്, പാക്കിസ്ഥാന്‍, കെനിയ, ശ്രീലങ്ക, ന്യൂസിലാന്‍ഡ്, കെനിയ എന്നീ ടീമുകള്‍ക്കെതിരെയായിരുന്നു ഗാംഗുലി ഇന്ത്യയെ വിജയത്തിലേക്ക് നയിച്ചത്. ഫൈനലില്‍ ഓസ്‌ട്രേലിയയോട് തോറ്റാണ് ഇന്ത്യയുടെ കുതിപ്പ് അവസാനിച്ചത്.