തെങ്ങില്‍ കുടുങ്ങിയയാളെ രക്ഷപ്പെടുത്തി

ചേര്‍ത്തല: യന്ത്രത്തിന്റെ സഹായത്തോടെ തെങ്ങില്‍ കയറുന്നതിനിടെ മുകളില്‍ കുടുങ്ങിയയാളെ ഫയര്‍ഫോഴ്‌സിന്റെ സഹായത്തോടെ മറ്റൊരു തൊഴിലാളി രക്ഷിച്ച് താഴെയിറക്കി. വാരനാട് ഉണ്ണിഭവനില്‍ സത്യപ്രസാദാ (54)ണ് മാര്‍ച്ച് മൂന്നിന് ഉച്ചയോടെ വീട്ടുവളപ്പിലെ തെങ്ങില്‍ കുടുങ്ങിയത്. മുകളിലത്തെ വളവിലെത്തിയപ്പോള്‍ യന്ത്രം തിരിഞ്ഞുപോയതോടെ ഇയാള്‍ കുടുങ്ങിപ്പോകുകയായിരുന്നു. കൈയിലുണ്ടായിരുന്ന വടം ഉപയോഗിച്ച് സ്വന്തം ശരീരം തെങ്ങില്‍ കൂട്ടിക്കെട്ടിയ ശേഷം ബഹളം കൂട്ടി നാട്ടുകാരെ അറിയിച്ചു. വിവരമറിഞ്ഞെത്തിയ ഫയര്‍ഫോഴ്‌സിന്റെ സഹായത്തോടെ മറ്റൊരു തൊഴിലാളി തെങ്ങില്‍ കയറി യന്ത്രത്തിന്റെ തിരിഞ്ഞുപോയ ഭാഗം നേരെയാക്കി സത്യപ്രസാദിനെ താഴെയിറക്കുകയായിരുന്നു. വിവരമറിഞ്ഞ് ചേര്‍ത്തല പോലീസും സ്ഥലത്തെത്തി.