ചേര്‍ത്തല: തൈക്കല്‍ പ്രദേശത്ത് സംഘ പ്രസ്ഥാനങ്ങളുടെ കൊടിമരങ്ങള്‍ നശിപ്പിക്കുന്നതിനിടെ സിപിഎമ്മുകാരനെ നാട്ടുകാര്‍ പിടികൂടി പോലീസിലേല്‍പ്പിച്ചു. കടക്കരപ്പള്ളി പഞ്ചായത്ത് കല്ലുപുരയ്‌ക്കല്‍ പ്രിന്‍സിനെയാണ് വെള്ളിയാഴ്ച രാത്രി 12.30ന് തൈക്കല്‍ ജങ്ഷനിലെ കൊടിമരം നശിപ്പിക്കുന്നതിനിടെ നാട്ടുകാര്‍ പിടികൂടി അര്‍ത്തുങ്കല്‍ പോലീസിലേല്‍പ്പിച്ചത്.
പ്രദേശത്ത് നാളുകളായി കൊടിമരങ്ങള്‍ നശിപ്പിക്കുന്നത് പതിവായിരുന്നു. കൊടിമരങ്ങള്‍ നശിപ്പിക്കുന്നത് തടയാന്‍ നാട്ടുകാരുടെ നേതൃത്വത്തില്‍ രൂപീകരിച്ച കര്‍മ്മസമിതിയാണ് ഇയാളെ പിടികൂടിയത്. കൊടിമരത്തിന്റെ മുകളിലിരുന്ന പ്രിന്‍സ് കര്‍മ്മസമിതി പ്രവര്‍ത്തകരെ കണ്ട് ഭയന്ന് താഴെ വീണു. കൂടെയുണ്ടായിരുന്ന രണ്ട് പ്രതികള്‍ ഓടി രക്ഷപ്പെടുകയായിരുന്നു. പ്രതികള്‍ സഞ്ചരിച്ച ബൈക്കും പോലീസ് കസ്റ്റഡിയിലെടുത്തു. സംഘപരിവാറിന്റെ കൊടികള്‍ നശിപ്പിക്കുന്നതില്‍ പ്രതിഷേധിച്ച് തൈക്കല്‍ പ്രദേശത്ത് പ്രതിഷേധപ്രകടനവും സമ്മേളനവും നടത്തി.
പ്രതികരിക്കാൻ ഇവിടെ എഴുതുക: