ബഞ്ചുകളിലിരുന്ന് ധനം കടമായി നല്കിയും പലിശയോടെ തിരിച്ചു കൈപ്പറ്റുകയും ചെയ്തായിരുന്നു ആരംഭകാലത്ത് യൂറോപ്പിലെ ധനസ്ഥാപനങ്ങളുടെ പ്രവര്ത്തനം. ‘ബാംകു’ എന്നുച്ചാരണമുള്ള പദമായിരുന്നു ‘ബെഞ്ച്’ എന്നതിനുപകരം ഉപയോഗിച്ചിരുന്നത്. ഫ്രഞ്ചു ഭാഷയിലും ഭാരതത്തിലെ കൊങ്കണിയിലും ബാംകും എന്നുതന്നെയാണ് ഇന്നും ബെഞ്ച് എന്ന ഇംഗ്ലീഷ് പദത്തിന്റെ സമാനപദം. ഈ ബാംകുവാണ് കാലക്രമേണ ”ബാങ്ക്” എന്ന ഇംഗ്ലീഷ് ഭാഷാ പദമായി ലോകമെങ്ങും പ്രസിദ്ധമായത്.
ഈ മാസം രണ്ടാം തീയതി തന്റെ ഒരു പ്രസംഗത്തില് നമ്മുടെ പ്രധാനമന്ത്രി നരേന്ദ്രമോദി ഒരു ഉദ്ബോധനം ചെയ്യുകയുണ്ടായി. ”ബാങ്കുകള് സാമൂഹ്യമാറ്റത്തിന് പ്രവര്ത്തിക്കണം” (ജന്മഭൂമി 03/01)എന്നായിരുന്നു ഉദ്ബോധനത്തിന്റെ കാതല്. ബാങ്കുകളുടെ പ്രവര്ത്തനം, നിക്ഷേപസമാഹരണത്തിലും ഉന്നത/മധ്യ ധനവരുമാനക്കാര്ക്ക് വായ്പകള്, ഇതര സേവനങ്ങള് എന്നിവ നല്കുന്നതിലും മാത്രമൊതുങ്ങാതെ ഭാരതത്തിന്റെ സാമൂഹ്യമാറ്റത്തിനും വേണ്ടിയാകണമെന്നാണ് പ്രധാനമന്ത്രി ഉദ്ബോധിപ്പിച്ചത്!
ഭാരതത്തിലെ ദേശസാല്കൃത ബാങ്കുകള് വഴി ഗ്രാമങ്ങളിലെ ചെറുകര്ഷകര്ക്കും ചെറുകിട സംരംഭകര്ക്കും ധനസഹായം (വായ്പ)എത്തിക്കുന്നതിനായി ഗ്രാമീണ ബാങ്കുകള് സ്ഥാപിച്ച് പ്രവര്ത്തനം ആരംഭിപ്പിച്ചെങ്കിലും കുറഞ്ഞ പലിശ നല്കിയുള്ളവയും സമയോചിതമായവയുമായ വായ്പകള് ഗ്രാമീണര്ക്ക് ലഭ്യമാകാത്തതിനാലാണ് ധാരാളം കര്ഷകരുടെ ആത്മഹത്യകള്ക്ക് നമ്മള് വെറും ശ്രോതാക്കളും വായനക്കാരും ആകുന്നത്.
ഏഴുശതമാനം വാര്ഷിക പലിശനിരക്കിനു താഴെയുള്ള നിരക്കില് കര്ഷകര്ക്ക് സ്വര്ണ പണയവായ്പാ പദ്ധതി ബാങ്കുകളിലുണ്ടെങ്കിലും കുറഞ്ഞപലിശക്ക് വായ്പ ലഭിക്കുന്നത് കര്ഷകരല്ലാത്ത നഗരവാസികള്ക്കാണ്. തങ്ങള് കര്ഷകരാണെന്ന് വായ്പാ അപേക്ഷയില് ചേര്ത്താല് മാത്രം മതിയാകും, കുറഞ്ഞ പലിശ നിരക്കില് സ്വര്ണപണയ വായ്പ ലഭിക്കാന്. ബാങ്ക് ഉദ്യോഗസ്ഥ/ജീവനക്കാരുടെ പരിചയമാണ് വായ്പ ലഭിക്കാന് ഒരു ഉപായം. കൃഷി വായ്പാ ലക്ഷ്യമെത്തിച്ചെന്ന് ബാങ്കുകള്ക്ക് കൊട്ടിഘോഷിക്കാന് ഈ രീതി ഉപകരിക്കുന്നു. സ്വര്ണാഭരണങ്ങള് ഈടിലായതിനാല് ബാങ്കുകള്ക്ക് നഷ്ടപ്പെടാനൊന്നുമില്ല. ഇത്തരം വായ്പയെടുത്ത് ബാങ്കുകളില് തന്നെ ഉയര്ന്ന പലിശക്ക് നിക്ഷേപമായും ഉയര്ന്ന പലിശക്ക് വ്യക്തികള്ക്ക് വായ്പയായും നല്കുന്നവര് ഏറിവരികയാണ്, ബാങ്കുകളുടെ ഈ വായ്പാ പദ്ധതിയിലൂടെ.
ബാങ്ക് ഉദ്യോഗസ്ഥരിലും അവര്ക്ക് മാര്ഗനിര്ദ്ദേശം നല്കുന്ന ബാങ്ക് ഉന്നതരിലും കുറഞ്ഞ അളവിലെങ്കിലും സാമൂഹ്യസേവാ പ്രതിബദ്ധത സ്വാംശീകരിച്ചുകഴിഞ്ഞാലേ, നമ്മുടെ പ്രധാനമന്ത്രിയുടെ ഉദ്ബോധനത്തിന് അതിന്റെ ലക്ഷ്യത്തിലെത്തുവാന് സാധിക്കൂ.
പ്രതികരിക്കാൻ ഇവിടെ എഴുതുക: