ഒരു സെക്കന്റ് ക്ലാസ് യാത്ര എന്ന ചിത്രത്തില്‍ വിനീത് ശ്രീനിവാസനും നിക്കി ഗല്‍റാനിയും കേന്ദ്രകഥാപാത്രങ്ങളെ അവതരിപ്പിക്കുന്നു. നവാഗതരായ രജീഷും ജാക്‌സണ്‍ ആന്റണിയുമാണ് ഈ ചിത്രം സംവിധാനം ചെയ്യുന്നത്. ചിത്രത്തില്‍ പ്രണയജോഡികളായല്ല വിനീതും നിക്കിയും അഭിനയിക്കുന്നത്.
വിനീതിന്റെ സഹോദരിയുടെ വേഷമാണ് നിക്കിക്ക് ഈ ചിത്രത്തിലുള്ളത്. ഇതൊരു റോഡ് മൂവിയല്ലെന്ന് സംവിധായകര്‍ പറയുന്നു. എന്നാല്‍ ചിത്രത്തിന്റെ ആദ്യപകുതി പുരോഗമിക്കുന്നത് കണ്ണൂരില്‍ നിന്നും തിരുവനന്തപുരത്തേക്കുള്ള ഒരു ട്രെയിന്‍ യാത്രയിലൂടെയാണ്. നെടുമുടി വേണു, ഇന്നസെന്റ്, ഇന്ദ്രന്‍സ്, ശ്രീജിത്ത് രവി, ചെമ്പന്‍ വിനോദ് ജോസ്, ജോജു ജോര്‍ജ്ജ് തുടങ്ങിയവരാണ് ഒരു സെക്കന്റ് ക്ലാസ് യാത്രയിലെ മറ്റുതാരങ്ങള്‍.
വെള്ളിമൂങ്ങ എന്ന ചിത്രത്തില്‍ കേന്ദ്രകഥാപാത്രത്തെ അവതരിപ്പിച്ച നിക്കിക്ക് മലയാളത്തില്‍ ഇപ്പോള്‍ കൈനിറയെ ചിത്രങ്ങളാണുള്ളത്. ദിലീപ് നായകനാകുന്ന ഇവന്‍ മര്യാദരാമന്‍, രുദ്രസിംഹാസനം തുടങ്ങിയവയാണ് നിക്കിയുടേതായി പുറത്തിറങ്ങാനുള്ള മറ്റുചിത്രങ്ങള്‍. ഓര്‍മയുണ്ടോ ഈ മുഖമാണ് വിനീത് നായകനായി അടുത്തിടെയിറങ്ങിയ ചിത്രം. വിനീത് തിരക്കഥ രചിക്കുന്ന ഒരു വടക്കന്‍ സെല്‍ഫിയില്‍ നിവിന്‍ പോളിയാണ് നായകന്‍.
പ്രതികരിക്കാൻ ഇവിടെ എഴുതുക: