കാര്‍ കുറ്റിക്കാട്ടിലേക്ക് ഇടിച്ചുകയറി; യാത്രികര്‍ അത്ഭുതകരമായി രക്ഷപ്പെട്ടു

ആലപ്പുഴ: മൂന്നംഗ കുടുംബം സഞ്ചരിച്ചിരുന്ന കാര്‍ നിയന്ത്രണം വിട്ട് മത്സ്യത്തട്ട് ഇടിച്ചു തെറിപ്പിച്ച ശേഷം സമീപത്തെ കുറ്റിക്കാട്ടില്‍ ഇടിച്ചുകയറി. യാത്രക്കാര്‍ അത്ഭുതകരമായി രക്ഷപെട്ടു. ഞായറാഴ്ച പുലര്‍ച്ചെ മൂന്നോടെ ദേശീയപാതയില്‍ വണ്ടാനം ഓട്ടോ സ്റ്റാന്‍ഡിന് സമീപമായിരുന്നു അപകടം. എറണാകുളത്ത് നിന്നും മാവേലിക്കരയ്‌ക്ക് പോകുകയായിരുന്ന കാറാണ് നിയന്ത്രണം വിട്ട് ദേശീയപാതക്ക് സമീപം സ്ഥാപിച്ചിരുന്ന മത്സ്യത്തട്ട് ഇടിച്ചുതകര്‍ത്ത ശേഷം സമീപത്തെ പത്തടി താഴ്ചയുള്ള കുറ്റിക്കാട്ടില്‍ ഇടിച്ചുകയറിയത്. കാറിലുണ്ടായിരുന്ന മാവേലിക്കര ആറ്റുവാലിക്കല്‍ അലക്‌സ് (62), ഇയാളുടെ ഭാര്യ എക്‌സി (50), മകന്‍ ഐജു (20) എന്നിവര്‍ അത്ഭുതകരമായി രക്ഷപെടുകയായിരുന്നു. കാര്‍ ഇടിച്ചുകയറുന്നതിന്റെ ശബ്ദം കേട്ട് ഓടിയെത്തിയ ഓട്ടോ ഡ്രൈവറന്മാര്‍ ഇവരെ രക്ഷപെടുത്തുകയായിരുന്നു. കാര്‍ ഓടിച്ചിരുന്ന അലക്‌സ് ഉറങ്ങിപ്പോയതാണ് അപകടത്തിനുകാരണമെന്ന് കരുതുന്നു. പുന്നപ്ര എസ്‌ഐ: ജയന്റെ നേതൃത്വത്തിലുള്ള പോലീസ് സംഘം ക്രെയിന്‍ ഉപയോഗിച്ചു കുറ്റിക്കാട്ടില്‍ നിന്നും കാര്‍ പുറത്തെടുക്കുകയായിരുന്നു.