കൊച്ചി: ജഗതി ശ്രീകുമാര്‍ സഞ്ചരിച്ച ടാക്‌സി കാറിന്റെ ഡ്രൈവറായ അനില്‍കുമാറിന് സഹായവുമായി ജഗതി ശ്രീകുമാറിന്റെ കുടുംബമെത്തി. അനില്‍കുമാറിന്റെ നാടായ പെരുമ്പാവൂരിലെത്തി ജഗതിയുടെ മരുമകന്‍ അഡ്വ.ഷോണ്‍ ജോര്‍ജ്ജാണ് രണ്ടുലക്ഷം രൂപയുടെ ചെക്ക് അനില്‍കുമാറിന് കൈമാറിയത്.
2012 മാര്‍ച്ച് 10നാണ് ജഗതിശ്രീകുമാറിന് അപകടം സംഭവിച്ചത്. എറണാകുളത്തുനിന്നും കൂര്‍ഗിലേക്കുള്ള യാത്രക്കിടെ കോഴിക്കോട് തേഞ്ഞിപാലത്തിന് സമീപം രാത്രി മൂന്നരയ്‌ക്ക് ഡിവൈഡറിലിടിച്ചാണ് ജഗതിശ്രീകുമാറിന് ഗുരുതരമായി പരിക്കേറ്റത്. വണ്ടിയുടെ ഉടമ കൂടിയായ അനില്‍കുമാറിന് ഇന്‍ഷ്വറന്‍സ് കമ്പനിയില്‍ നിന്നും നഷ്ടപരിഹാരം ഒന്നും കിട്ടിയില്ല എന്ന വാര്‍ത്ത വന്നതോടുകൂടിയാണ് ജഗതിയുടെ കുടുംബം ധനസഹായവുമായി എത്തിയത്.
പെരുമ്പാവൂരില്‍ നടന്ന സ്വകാര്യ ചടങ്ങിലാണ് ചെക്ക് കൈമാറിയത്. പെരുമ്പാവൂര്‍ മുനിസിപ്പല്‍ ചെയര്‍മാന്‍ കെ.എം.എ.സലാമിന്റെ സാന്നിദ്ധ്യത്തില്‍ നടന്ന ചടങ്ങില്‍ കെ.പി.ബാബു, ബേസില്‍ അരീക്കല്‍, സി.ആര്‍.പൗലോസ്, സുനില്‍വാഗപ്പള്ളി എന്നിവര്‍ സന്നിഹിതരായിരുന്നു.
പ്രതികരിക്കാൻ ഇവിടെ എഴുതുക: