കണ്ണൂര്‍: പെരളശ്ശേരി എകെജി ജിഎച്ച്എസ്എസിലെ എട്ടാം ക്ലാസ് വിദ്യാര്‍ത്ഥിനിയെ പ്രലോഭിപ്പിച്ച് തട്ടിക്കൊണ്ടുപോയ സംഭവത്തില്‍ പ്രതികളെ സഹായിക്കാന്‍ ശ്രമം നടക്കുന്നതായി ആരോപണം. രക്ഷിതാക്കള്‍ ജോലിക്ക് പോയ സമയത്ത് കടയിലേക്കെന്ന് പറഞ്ഞ് പോയ വിദ്യാര്‍ത്ഥിനിയെ മൂന്നുപെരിയക്കടുത്ത് നിര്‍മാണം നടന്നുകൊണ്ടിരിക്കുന്ന വീട്ടില്‍ വെച്ചാണ് പ്രായപൂര്‍ത്തിയാകാത്ത നാലോളം വിദ്യാര്‍ത്ഥികള്‍ പീഡിപ്പിച്ചത്. പെണ്‍കുട്ടിയെ കാണാതായതിനെ തുടര്‍ന്ന് ബന്ധുക്കളും നാട്ടുകാരും തെരച്ചില്‍ നടത്തവേയാണ് പ്രദേശത്തെ രണ്ട് വിദ്യാര്‍ത്ഥികളെയും കാണാതായ വിവരം അറിയുന്നത്.
രാത്രി പതിനൊന്നര മണിയോടെ വിദ്യാത്ഥികളില്‍ ഒരാളുടെ അമ്മയും സഹോദനും കൂടി ഒരു ബൈക്കില്‍ പെണ്‍കുട്ടിയെ വീട്ടിലെത്തിക്കുകയായിരുന്നു. ഇതിനിടയില്‍ രോഷാകുലരായ നാട്ടുകാരും ബന്ധുക്കളും ഇവരെ തടഞ്ഞുവെക്കുകയും ചക്കരക്കല്ല് പോലീസില്‍ ഹാജരാക്കുകയുമായിരുന്നു. നാടിനെ നടുക്കിയ സംഭവം നടന്നിട്ടും യഥാര്‍ത്ഥ പ്രതികളെ പിടികൂടാന്‍ പോലീസ് യാതൊരു ഗൗരവവും കാട്ടുന്നില്ലെന്നും ഇത് കുറ്റവാളികളെ രക്ഷിക്കാനുള്ള നീക്കമാണെന്നും നാട്ടുകാര്‍ ആരോപിക്കുന്നു.
പ്രതികരിക്കാൻ ഇവിടെ എഴുതുക: