അപകടാവസ്ഥയിലായ അങ്കണവാടി കെട്ടിടം
പൂച്ചാക്കല്‍: പാണാവള്ളി പഞ്ചായത്തിലെ 18-ാം വാര്‍ഡില്‍ കടവില്‍ ലക്ഷംവീടിനു സമീപത്ത് പ്രവര്‍ത്തിക്കുന്ന 63-ാം നമ്പര്‍ അങ്കണവാടി കെട്ടിടത്തിന്റെ ഒരുഭാഗം കഴിഞ്ഞ ദിവസം ഭൂമിക്കടിയിലേക്ക് താഴ്ന്നു. 10 വര്‍ഷത്തോളം പഴക്കമുള്ള കോണ്‍ക്രീറ്റ് കെട്ടിടത്തിന്റെ വടക്കുഭാഗമാണ് ഭൂമിക്കടിയിലേക്ക് താഴ്ന്നത്. കെട്ടിടം ഏതു നിമിഷവും തകര്‍ന്നുവീഴാന്‍ സാദ്ധ്യതയുണ്ട്. വിവിധ പ്രദേശങ്ങളില്‍ നിന്ന് 22 കുട്ടികള്‍ ഇവിടെ പഠിക്കുന്നു. കുട്ടികളുടെ പഠനം മുടങ്ങാതിരിക്കാന്‍ സമീപത്തുള്ള എസ്എന്‍ഡിപി ചാരിറ്റബിള്‍ ട്രസ്റ്റിന്റെ കെട്ടിടത്തിലാണ് അങ്കണവാടിയുടെ പ്രവര്‍ത്തനം. കെട്ടിടം പൂര്‍ണമായും പൊളിച്ചുമാറ്റിയിട്ടുവേണം പുതിയ അങ്കണവാടി കെട്ടിടം നിര്‍മ്മിക്കാന്‍. അധികൃതര്‍ ആവശ്യമായ നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെടുന്നു.
പ്രതികരിക്കാൻ ഇവിടെ എഴുതുക: