കെഎസ്ആര്‍ടിസി പെന്‍ഷന്‍കാര്‍ ദേശിയപാത ഉപരോധിക്കുന്നു
ആലപ്പുഴ: കെഎസ്ആര്‍ടിസി പെന്‍ഷന്‍ സര്‍ക്കാര്‍ ഏറ്റെടുക്കണമെന്നും കുടിശിക തീര്‍ത്ത് വിതരണം ചെയ്യണമെന്നും ആവശ്യപ്പെട്ട് കെഎസ്ആര്‍ടിസി പെന്‍ഷനേഴ്‌സ് ഓര്‍ഗനൈസേഷന്റെ നേതൃത്വത്തില്‍ ദേശീയപാത ഉപരോധിച്ചു. അഞ്ഞൂറോളം വരുന്ന പെന്‍ഷന്‍കാരാണ് ശനിയാഴ്ച രാവിലെ പതിനൊന്നോടെ അമ്പലപ്പുഴ കച്ചേരി മുക്കില്‍ ദേശിയപാത ഉപരോധിച്ചത്. ഇരട്ടക്കുളങ്ങര ജങ്ഷനില്‍ നിന്നും പ്രകടനമായി അമ്പലപ്പുഴ ബസ് സ്‌റ്റേഷന് സമീപമെത്തി യോഗം ചേര്‍ന്ന ശേഷം പതിനഞ്ച് മിനിറ്റോളം ഉപരോധം നടത്തി. സിഐടിയു ജില്ലാ ജോ: സെക്രട്ടറി അഡ്വ. ബി. രാജേന്ദ്രന്‍ ഉപരോധം ഉദ്ഘാടനം ചെയ്തു. ജില്ലാ പ്രസിഡന്റ് എം.വാസുദേവന്‍ പിള്ള അദ്ധ്യക്ഷത വഹിച്ചു. എന്‍.വി. തമ്പുരാന്‍, കെ. സോമന്‍പിള്ള, എം.എം. പണിക്കര്‍, സി. നടരാജന്‍, എം.വി. പ്രസന്നന്‍, ആര്‍. ഗോപി തുടങ്ങിയവര്‍ സംസാരിച്ചു. സമരക്കാരെ അമ്പലപ്പുഴ പൊലീസ് അറസ്റ്റ് ചെയ്തു നീക്കി.
പ്രതികരിക്കാൻ ഇവിടെ എഴുതുക: