ആലപ്പുഴ: വാഹനാപകടത്തില്‍ പരിക്കേറ്റ് റോഡില്‍ കിടന്ന പോലീസ് ഉദ്യോഗസ്ഥന് രക്ഷകനായ ഡോക്ടറെ അനുമോദിക്കുന്നു. ദേശീയപാതയില്‍ പട്ടണക്കാടിന് സമീപം ഞായറാഴ്ച പുലര്‍ച്ചെ പോലീസ് പട്രോളിങ് വാഹനത്തിന് പിന്നില്‍ ലോറിയിടിച്ച് അപകടത്തില്‍പ്പെട്ടവര്‍ക്ക് തുണയായി എത്തിയ വണ്ടാനം മെഡിക്കല്‍ കോളേജ് ആശുപത്രിയിലെ കാര്‍ഡിയോ തെറാസിക് അസോസിയേറ്റ് പ്രൊഫസര്‍ ഡോ. ഷഫീക്കിനെയാണ് ജില്ലാ പോലീസ് അസോസിയേഷന്റെ ആഭിമുഖ്യത്തില്‍ 25ന് ചേര്‍ത്തല പോലീസ് സ്‌റ്റേഷന്‍ ജനമൈത്രി ഹാളില്‍ നടക്കുന്ന ചടങ്ങില്‍ ആദരിക്കുന്നത്.
ജില്ലാ പോലീസ് ചീഫ് കെ. ബാലചന്ദ്രന്‍ ഉദ്ഘാടനം ചെയ്യും. പോലീസ് ഓഫീസേഴ്‌സ് അസോസിയേഷന്‍ ജില്ലാ പ്രസിഡന്റ് സിഐ: എസ്. ബിനു അദ്ധ്യക്ഷത വഹിക്കും. ചേര്‍ത്തല ഡിവൈഎസ്പി: ബാബുകുമാര്‍, അസോസിയേഷന്‍ ജില്ലാ സെക്രട്ടറി എസ്‌ഐ: ഹരിദാസ് തുടങ്ങിയവര്‍ പങ്കെടുക്കും. വാഹനാപകടത്തില്‍പ്പെട്ട് ഗുരുതരാവസ്ഥയില്‍ റോഡരികില്‍ കിടന്ന പട്ടണക്കാട് പോലീസ് സ്‌റ്റേഷനിലെ സിവില്‍ പോലീസ് ഓഫീസര്‍ നവറോജിനെ ചേര്‍ത്തല സ്വകാര്യ ആശുപത്രിയില്‍ എത്തിച്ച ഡോക്ടര്‍ ഷഫീക് അടിയന്തര ചികിത്സക്ക് നേതൃത്വം നല്‍കി.
രണ്ടുമണിക്കൂറുകളോളം നീണ്ട അടിയന്തര ചികിത്സയിലൂടെ ശ്വാസനാളത്തില്‍ നിറഞ്ഞ രക്തം നീക്കിയശേഷം പുലര്‍ച്ചെ അഞ്ചോടെ പ്രത്യേക ആംബുലന്‍സില്‍ നവറോജിനെ എറണാകുളത്തെ സ്വകാര്യ ആശുപത്രിയില്‍ എത്തിക്കാനുളള ക്രമീകരണങ്ങളും ഡോക്ടര്‍ ചെയ്തിരുന്നു.
പ്രതികരിക്കാൻ ഇവിടെ എഴുതുക: