കട്ടപ്പന : എഐടിയു സി ഹെഡ് ലോഡ് യൂണിയന്‍ സംസ്ഥാന സമിതിയംഗവും സി പി ഐ കട്ടപ്പന ലോക്കല്‍ കമ്മിറ്റിയംഗവുമായ കെ സി ബിനോയിയുടെ നേതൃത്വത്തില്‍ കട്ടപ്പനയിലെ എ ഐ ടി യു സി ഹെഡ് ലോഡ് യൂണിയനിലെ മുഴുവന്‍ തൊഴിലാളികളും ബി എം എസില്‍ ചേര്‍ന്നു. എ ഐ ടി യു സി നേതൃത്വത്തിന്റെ തൊഴിലാളി വിരുദ്ധ സമീപനത്തില്‍ പ്രതിഷേധിച്ചാണ് രാജി വെച്ചതെന്ന് തൊഴിലാളികള്‍ പറഞ്ഞു. തൊഴിലും തൊഴിലവകാശങ്ങളും സംരക്ഷിക്കുന്നതില്‍ ബി എം എസ് നേതൃത്വം എടുക്കുന്ന നിലപാടുകളോട് ഐക്യദാര്‍ഢ്യം പ്രഖ്യാപിച്ചു കൊണ്ടാണ് തങ്ങള്‍ ബി എം എസില്‍ ചേര്‍ന്ന് പ്രവര്‍ത്തിക്കാന്‍ തീരുമാനിച്ചതെന്നും തൊഴിലാളികള്‍ പറഞ്ഞു.
പുതുതായി ബി എം എസില്‍ ചേര്‍ന്നവര്‍ക്ക് ജില്ലാ ജോ:സെക്രട്ടറി എന്‍ ബി മോഹന്‍ദാസ് മെമ്പര്‍ഷിപ്പുകള്‍ വിതരണം ചെയ്തു. വിവിധ യൂണിയനുകളില്‍ പ്രവര്‍ത്തിക്കുന്ന നിരവധി തൊഴിലാളികള്‍ ബി എം എസിലേക്ക് വരാന്‍ തയ്യാറെടുക്കുകയാണെന്നും അവര്‍ക്ക് എല്ലാ വിധ പിന്‍തുണയും നല്കുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: