കഞ്ചാവ് കടത്തിന്റെ ഇടനിലക്കാരനെന്ന് സംശയം: വീട്ടില്‍ മൂന്ന് വടിവാള്‍ ഒളിപ്പിച്ച് വച്ച യുവാവ് അറസ്റ്റില്‍

രാജാക്കാട് : കഞ്ചാവ്

കച്ചവടത്തിന്റെ ഇടനിലക്കാരനെന്ന് സംശയിക്കുന്ന യുവാവിന്റെ വീട്ടില്‍ പോലീസ് റെയ്ഡ്, മൂന്ന് വടിവാള്‍ കണ്ടെടുത്തു. പ്രതി അറസ്റ്റില്‍. രാജാക്കാട് രുഗ്മിണി നിവാസില്‍ അഭിജിത് (21)നെയാണ് രാജാക്കാട് എസ്.ഐയുടെ നേതൃത്വത്തിലുള്ള പോലീസ് സംഘം രഹസ്യവിവരത്തിന്റെ അടിസ്ഥാനത്തില്‍ പിടികൂടിയത്. പ്രതിയുടെ കിടപ്പുമുറിയില്‍ നിന്നും മൂന്ന് വടിവാളുകളും ബൈക്കിന്റെ സയലന്‍സറും കണ്ടെടുത്തിട്ടുണ്ട്. സയലന്‍സര്‍ മോഷ്ടിച്ച ബൈക്കിന്റേതാണെന്ന് പ്രതി സമ്മതിച്ചിട്ടുണ്ട്. മോഷ്ടിച്ച ബൈക്ക് പൊളിച്ച് വിറ്റപ്പോള്‍ ശേഷിച്ചതാണ് സയലന്‍സര്‍. ബൈക്കിന്റെ പലഭാഗങ്ങളും പലര്‍ക്കാണ് വിറ്റിരിക്കുന്നത്. മോഷണക്കേസില്‍ അഭിജിത്തിനൊപ്പം മറ്റ് രണ്ട് പേരും ഉള്ളതായി പോലീസിന് വിവരം ലഭിച്ചിട്ടുണ്ട്. ഇയാളെ കൂടുതല്‍ ചോദ്യം ചെയ്യലിന് വിധേയമാക്കുമെന്ന് രാജാക്കാട് പോലീസ് അറിയിച്ചു. കേസില്‍ പലവിവരങ്ങളും ലഭിച്ചിട്ടുണ്ടെങ്കിലും പോലീസ് വെളിപ്പെടുത്തിയിട്ടില്ല. പ്രതിക്കെതിരെ ആയുധ നിയമപ്രകാരമാണ് ഇപ്പോള്‍ കേസെടുത്തിരിക്കുന്നത്. മോഷണക്കേസും ഉടന്‍ ചാര്‍ജ് ചെയ്യും. രാജാക്കാട് എസ്.ഐ. ഷാജിയുടെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.