ഗാന്ധി ജയന്തി വാരാഘോഷം ഇന്ന് തുടങ്ങും

ആലപ്പുഴ: ഗാന്ധി ജയന്തി വാരാഘോഷം ജില്ലയില്‍ വിപുലമായി സംഘടിപ്പിക്കുന്നു. വ്യാഴാഴ്ച രാവിലെ 9.30ന് സിവില്‍ സ്‌റ്റേഷനത്തിലെ ഗാന്ധി സ്മൃതി മണ്ഡപത്തില്‍ നടക്കുന്ന ചടങ്ങില്‍ കെ.സി. വേണുഗോപാല്‍ എംപി വാരാഘോഷത്തിന്റെ ജില്ലാതല ഉദ്ഘാടനം നിര്‍വഹിക്കും. ജി. സുധാകരന്‍ എംഎല്‍എ അദ്ധ്യക്ഷത വഹിക്കും. മഹാത്മാവിന്റെ പ്രതിമയില്‍ ഹാരാര്‍പ്പണം, പുഷ്പാര്‍ച്ചന, സര്‍വ്വമതപ്രാര്‍ഥന, ഗാന്ധിയന്‍ ആശയങ്ങളും ഗാന്ധിജിയുടെ ചിത്രങ്ങളും ഉള്‍പ്പെട്ട ഫോട്ടോ പ്രദര്‍ശനം, ലഹരി-മദ്യവിപത്തിനെതിരെ കൂട്ടയോട്ടം, ഹ്രസ്വചിത്രപ്രദര്‍ശനം തുടങ്ങി ഒട്ടേറെ പരിപാടികളാണു വാരാഘോഷത്തിന്റെ ഭാഗമായി നടത്തുന്നത്. രാവിലെ 10ന് എക്‌സൈസ് വകുപ്പ്, സ്റ്റുഡന്റ് പോലീസ് കേഡറ്റ്, നാഷണല്‍ സര്‍വീസ് സ്‌കീം, നെഹ്‌റു യുവകേന്ദ്ര, യുവജനക്ഷേമ ബോര്‍ഡ്, യൂത്ത് ക്ലബ്ബുകള്‍ എന്നിവയുടെ സഹകരണത്തോടെ ലഹരി-മദ്യവിപത്തിനെതിരെ കൂട്ടയോട്ടം നടത്തും. 10.15ന് ജനറല്‍ ആശുപത്രിയില്‍ ശുചീകരണവും പ്ലാസ്റ്റിക് നിര്‍മ്മാര്‍ജനയജ്ഞത്തിന്റെ നഗരസഭാതല ഉദ്ഘാടനവും നടക്കും. 10.30ന് എസ്എല്‍പുരം ഗാന്ധി സ്മാരകഗ്രാമസേവാ കേന്ദ്രത്തില്‍ വിശ്വശാന്തി ദിനാചരണവും സ്വാശ്രയസംഘങ്ങളുടെ ഉത്പന്നപ്രദര്‍ശനവും വിപണനവും നടക്കും. 1.30ന് ജനപ്രതിനിധികളും വിവിധ വകുപ്പുദ്യോഗസ്ഥരും ഗാന്ധി സ്മൃതി മണ്ഡപം സമിതിയംഗങ്ങളും വിദ്യാലയങ്ങളിലും ഓഫീസുകളിലും സന്ദര്‍ശനം നടത്തി ശുചിത്വസന്ദേശം പ്രചരിപ്പിക്കും. ഉച്ചയ്‌ക്ക് രണ്ടിന് ജില്ലാ ജയിലില്‍ ജയില്‍ അന്തേവാസികള്‍ക്ക് ബോധവത്കരണക്ലാസ് നടത്തും