മാന്നാര്‍(ആലപ്പുഴ): പ്രണയം നടിച്ച് പ്ലസ്ടു വിദ്യാര്‍ത്ഥിനിയെ ഗുണ്ടാസംഘത്തിന്റെ സഹായത്തോടെ മാന്നാറില്‍ നിന്നും ഇടുക്കിയിലേക്ക് തട്ടിക്കൊണ്ടുപോയി ഉപദ്രവിച്ച കേസില്‍ പ്രതിയായ കാമുകനെ ഏലയ്‌ക്കാ മോഷണത്തിന് അറസ്റ്റ് ചെയ്തു. കുട്ടമ്പേരൂര്‍ കുറ്റിക്കിഴക്കതില്‍ പ്രദീപി (21)നെയാണ് കട്ടപ്പന പോലീസ് അറസ്റ്റ് ചെയ്തത്.
ബുധനൂരില്‍ പ്ലസ്ടു വിദ്യാര്‍ഥിനിയായ പതിനേഴുകാരിയെ പ്രണയം നടിച്ച് വലയിലാക്കുകയായിരുന്നു. ഇയാളുടെ നിരന്തര ശല്യം മൂലം പെണ്‍കുട്ടി സ്‌കൂളില്‍ പോകുന്നത് നിര്‍ത്തി. തുടര്‍ന്ന് ഇയാള്‍ വീട്ടിലേക്ക് ചെല്ലുന്നത് പതിവായി. താക്കീത് ചെയ്‌തെങ്കിലും ഫലമുണ്ടായില്ല. പെണ്‍കുട്ടിയെ ബന്ധുവീടുകളിലേക്ക് മാറ്റി താമസിപ്പിച്ചു. ഓണത്തിന് ശേഷം ഹൈദരാബാദിലുള്ള ബന്ധുവിനൊപ്പം അയക്കാന്‍ സാദ്ധ്യതയുണ്ടെന്ന് മനസിലാക്കിയ പ്രദീപ്, സുധികുമാര്‍ എന്നയാളുടെ സഹായം തേടി.
തന്റെ ബൈക്ക് പണയം വച്ചുകിട്ടിയ പണവുമായി സുധികുമാറിന്റെ സഹോദരന്‍ ഓമനക്കുട്ടന്‍, വിമല്‍ തുടങ്ങിയവരുടെ സഹായത്തോടെ കഴിഞ്ഞ അഞ്ചിന് പെണ്‍കുട്ടിയെ കാറില്‍ കടത്തിക്കൊണ്ടുപോകുകയായിരുന്നു. കടമണ്‍കാവിലെ ഏലത്തോട്ടത്തിന് സമീപം ഇയാളുടെ അമ്മായിയുടെ വീട്ടില്‍ വച്ച് പെണ്‍കുട്ടിയെ ഉപദ്രവിക്കുകയായിരുന്നു. 40 കിലോഗ്രാം ഏലയ്‌ക്ക വില്‍ക്കാനായി കടയില്‍ എത്തിയപ്പോള്‍ സംശയം തോന്നിയതിനെ തുടര്‍ന്ന് ഇവര്‍ പോലീസില്‍ വിവരമറിയിക്കുകയായിരുന്നു.
പോലീസ് ചോദ്യം ചെയ്തപ്പോഴാണ് ഏലയ്‌ക്ക മോഷ്ടിച്ചതാണെന്ന് അറിയുന്നത്. ഇയാളുമായി താമസ സ്ഥലത്ത് എത്തിയപ്പോഴാണ് പോലീസ് പെണ്‍കുട്ടിയെ കാണുന്നതും തട്ടിക്കൊണ്ടുവന്ന് ഉപദ്രവിച്ച വിവരം അറിഞ്ഞത്. തുടര്‍ന്ന് ബന്ധുക്കള്‍ എത്തി പെണ്‍കുട്ടിയെ കൂട്ടിക്കൊണ്ടുപോയി. മാന്നാര്‍ സിഐ: ആര്‍. ബിനുവിന്റെ നേതൃത്വത്തില്‍ കടമണ്‍കാവിലെ എസ്‌റ്റേറ്റില്‍ പ്രതിയുമായി തെളിവെടുപ്പ് നടത്തി.
പ്രതികരിക്കാൻ ഇവിടെ എഴുതുക: