ശ്രീരാമചന്ദ്രന്റെ മഹത്വവും മാനവികതയും പ്രകീര്‍ത്തിക്കുന്ന കൃതികൂടിയാണ് രാമായണം. വാത്മീകിയുടെ മൂലഗ്രന്ഥത്തെ ആസ്പദമാക്കി തുഞ്ചത്തു രാമാനുജനെഴുത്തച്ഛന്‍ എഴുതിയ കിളിപ്പാട്ടാണ് മലയാളിക്കേറെ പരിചിതമായ അദ്ധ്യാത്മ രാമായണം.
രാമായണം എന്ന വാക്കിന്റെ വ്യാപകമായ അര്‍ത്ഥം രാമന്റെ അയനം എന്നാണ്. ‘അയനം’ എന്ന വാക്കിന് പല അര്‍ത്ഥങ്ങള്‍ ഉണ്ട്. മാര്‍ഗ്ഗം, പ്രാപ്യസ്ഥാനം, വ്യഖ്യാനം എന്നൊക്കെ അര്‍ത്ഥം കാണുന്നു.
ശ്രീരാമചന്ദ്രന്‍ എന്ന ഈശ്വരാവതാര സങ്കല്‍പ്പത്തെ ആധാരമാക്കി മനുഷ്യജീവിതത്തിന്റെ വൈവിധ്യവും വൈരുദ്ധ്യവുമായ തലങ്ങളെ കൂട്ടിയിണക്കി ആധുനിക മനുഷ്യന് മാര്‍ഗ്ഗദര്‍ശനം നല്‍കുന്നു രാമായണം. പ്രകൃതിയും മനുഷ്യനും തമ്മിലുള്ള അനിഷേധ്യമായ ബന്ധം രാമായണം പ്രഖ്യാപിക്കുന്നു. അലയുന്ന മനുഷ്യന് ലക്ഷ്യസ്ഥാനം കാട്ടിത്തരുവാനും ധര്‍മ്മമാര്‍ഗ്ഗം വെടിയുന്ന മനുഷ്യന് കര്‍മ്മമാര്‍ഗ്ഗവും നഷ്ടമാകും എന്ന പ്രകൃതി സത്യം രാമായണം ആധുനിക ലോകത്തിന് മുമ്പില്‍ തുറന്നിടുന്നു.
ജ്ഞാനവും ഭക്തിയും കര്‍മ്മ സന്ദേശവും രാമായണത്തിലെമ്പാടും നിറഞ്ഞുനില്‍ക്കുന്നു.
കാട്ടാളനായ രത്‌നാകരന്‍ വാല്മീകി മഹര്‍ഷിയായി മാറി രാമായണം ചമയ്‌ക്കാനുണ്ടായ നിയോഗം വേദസമ്മതമാണ്.
നാനാത്വത്തിലുള്ള ഏകത്വമാണ് രാമായണ സങ്കല്‍പ്പം. ആദ്ധ്യാത്മരാമായണം ആത്മപ്രദീപകവും അത്യന്തം രഹസ്യവുമാണെന്ന് രാമായണം തന്നെ ഉദ്‌ഘോഷിക്കുന്നു.
വേണ്ടുന്നവര്‍ക്ക് വേണ്ടുവോളം ആദ്ധ്യാത്മികജ്ഞാനം രാമായണത്തില്‍ നിന്ന് പകര്‍ന്നെടുക്കാം.
രാമായണം ഒരിക്കലും വറ്റാത്ത ആദ്ധ്യാത്മിക സ്രോതസ്സാണ്.
അയ്മനം രവീന്ദ്രന്‍
പ്രതികരിക്കാൻ ഇവിടെ എഴുതുക