പറവൂര്: പെരുവാരം മഹാദേവക്ഷേത്രത്തിന്റെ പടിഞ്ഞാറെ നടയില് തിരുവിതാംകൂര് ദേവസ്വം ബോര്ഡ് സ്വന്തം സ്ഥലത്ത് സ്ഥാപിച്ച ഗെയ്റ്റ് പൊളിച്ചുമാറ്റാനുള്ള പറവൂര് മുനിസിപ്പാലിറ്റിയുടെ നീക്കത്തെ എന്തുവില കൊടുത്തും എതിര്ക്കുമെന്ന് ഹിന്ദു ഐക്യവേദി പറവൂര് താലൂക്ക് സമിതി. മാംസാവശിഷ്ടങ്ങളും മത്സ്യവും കയറ്റിപ്പോകുന്ന വാഹനങ്ങളും ശവശരീരം വഹിച്ചുകൊണ്ടുപോകുന്ന വാഹനങ്ങളും ക്ഷേത്രനടയിലൂടെ കടന്നുപോകുന്നത് ക്ഷേത്രശുദ്ധിയെ കളങ്കപ്പെടുത്തുന്നു.
ഇതിനെ തടയുന്നതിനും അന്യാധീനപ്പെട്ടുകൊണ്ടിരിക്കുന്ന ക്ഷേത്രഭൂമികള് സംരക്ഷിക്കുന്നതിനുംവേണ്ടിയാണ് ഗെയ്റ്റ് സ്ഥാപിച്ചത്. ഇതെല്ലാം കണ്ടില്ലെന്ന് നടിച്ച് ദേവസ്വം ബോര്ഡു ഭൂമിയില് യാതൊരു അവകാശവും ഇല്ലാത്ത മുനിസിപ്പാലിറ്റി ചില പ്രത്യേക താല്പ്പര്യം സംരക്ഷിക്കുന്നതിനുവേണ്ടിയാണ് ഈ നീക്കം നടത്തുന്നതെന്ന് ഹിന്ദുഐക്യവേദി ആരോപിച്ചു. താലൂക്ക് പ്രസിഡന്റ് ബി.പ്രസന്നകുമാര് അദ്ധ്യക്ഷത വഹിച്ച യോഗം സംസ്ഥാന ജനറല് സെക്രട്ടറി ആര്.വി.ബാബു ഉദ്ഘാടനം ചെയ്തു. ജില്ലാ സെക്രട്ടറി കെ.ആര്.രമേഷ്, താലൂക്ക് ജനറല് സെക്രട്ടറി എം.സി.സാബു ശാന്തി, തമ്പി കല്ലുപുറം, അമ്പാട്ട് സുബ്രഹ്മണ്യന്, കെ.ജി.മധു, കെ.ജി.സജീവ് എന്നിവര് സംസാരിച്ചു.
പുതിയ താലൂക്ക് ഭാരവാഹികളായി ബി.പ്രസന്നകുമാര് (പ്രസിഡന്റ്), കെ.ജി.മധു (വര്ക്കിങ് പ്രസിഡന്റ്), സി.കെ.അമ്പാടി (വൈസ് പ്രസിഡന്റ്) എം.സി.സാബു ശാന്തി(ജനറല് സെക്രട്ടറി), ബി.ബാബു, ഗോപകുമാര് കോട്ടപ്പുറം (സെക്രട്ടറിമാര്), ടി.പി.ബാബു(ട്രഷറര്) എന്നിവരെ തെരഞ്ഞെടുത്തു.
പ്രതികരിക്കാൻ ഇവിടെ എഴുതുക: