തിരുവനന്തപുരം: പത്മനാഭസ്വാമി ക്ഷേത്രത്തില്‍ വന്‍തോതില്‍ സ്വര്‍ണാപഹരണം നടന്നതായി സുപ്രീംകോടതിയുടെ അമിക്കസ്‌ ക്യൂറി റിപ്പോര്‍ട്ട്‌ ചെയ്ത സാഹചര്യത്തില്‍ ക്രമക്കേടുകളെക്കുറിച്ച്‌ സമഗ്ര അന്വേഷണം നടത്തണമെന്ന്‌ സി പി എം സംസ്ഥാന സെക്രട്ടേറിയറ്റ്‌ യോഗം ആവശ്യപ്പെട്ടു. ഇക്കാര്യം സുപ്രീംകോടതിയുടെ മുന്നില്‍ ഉന്നയിക്കാന്‍ സംസ്ഥാന സര്‍ക്കാര്‍ തയ്യാറാകണം.അമിക്കസ്‌ ക്യൂറിയുടെ റിപ്പോര്‍ട്ട്‌ ഞെട്ടിപ്പിക്കുന്നതാണ്‌. ക്രമക്കേടുകളുടെ ദീര്‍ഘമായ പട്ടികയും നിരത്തിയിട്ടുണ്ട്‌.
കോടതിയെ സഹായിക്കാന്‍ കോടതി നിയോഗിച്ച ഈ ഉന്നത അഭിഭാഷകന്റെ അന്വേഷണ റിപ്പോര്‍ട്ടിന്റെ പശ്ചാത്തലത്തില്‍, ക്ഷേത്രത്തിലെ അമൂല്യസമ്പത്ത്‌ നഷ്ടപ്പെടാതെ സംരക്ഷിക്കാന്‍ പര്യാപ്തമായ ഭരണ സംവിധാനം കാലവിളംബം കൂടാതെ സര്‍ക്കാര്‍ ഒരുക്കണം. ഇതിനായി സുപ്രീംകോടതിയുടെ തീര്‍പ്പ്‌ വരുന്നതിന്‌ അനുഗുണമായ നിലപാട്‌ സംസ്ഥാന സര്‍ക്കാര്‍ കൈക്കൊള്ളണം. അമിക്കസ്‌ ക്യൂറി റിപ്പോര്‍ട്ട്‌ പുറത്ത്‌ കൊണ്ടുവന്നിരിക്കുന്ന ക്രമക്കേടുകളുടെ പശ്ചാത്തലത്തില്‍ ക്ഷേത്രത്തിലെ അമൂല്യ വസ്തുശേഖരത്തിന്റെ സംരക്ഷണം ഉറപ്പാക്കാനും ക്ഷേത്ര സുരക്ഷക്കും അടിയന്തര നടപടികള്‍ കൈക്കൊള്ളണമെന്നും സി പി എം ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: