ന്യൂയോര്‍ക്ക്: യുഎസില്‍ ചെറുവിമാനം എക്‌സ്പ്രസ് വേയില്‍ അടിയന്തിരമായി ഇറക്കി. ബ്രോങ്ക്‌സിലെ മേജര്‍ ഡീഗന്‍ എക്‌സ്പ്രസ് വേയിലാണ് സംഭവം. പൈലറ്റും രണ്ടു വനിതകളുമാണ് വിമാനത്തിലുണ്ടായിരുന്നത്. ആര്‍ക്കും ഗുരുതരപരിക്കുകളില്ല. ഇവരെ സെന്റ് ബര്‍ണബാസ് ആശുപത്രിയില്‍ പ്രവേശിപ്പിച്ചു.
ഡാന്‍ബറിയില്‍ നിന്നു വരികയായിരുന്ന ചെറുവിമാനമാണ് അപകടത്തില്‍പെട്ടത്. സ്റ്റാച്യു ഓഫ് ലിബര്‍ട്ടി സന്ദര്‍ശിച്ച ശേഷം തിരികെ ഡാന്‍ബറിയിലേക്കു മടങ്ങുന്ന വഴി വിമാനത്തിന് യന്ത്രത്തകരാര്‍ ശ്രദ്ധയില്‍പെടുകയായിരുന്നു. ഇതിനെ തുടര്‍ന്ന് വിമാനം എക്‌സ്പ്രസ് വേയില്‍ അടിയന്തിരമായി ഇറക്കാന്‍ തീരുമാനിക്കുകയായിരുന്നു.
സാധാരണദിവസങ്ങളില്‍ തിരക്കുണ്ടായിരുന്ന എക്‌സ്പ്രസ് വേയില്‍ കുഴിയടയ്‌ക്കല്‍ ജോലി നടക്കുകയായിരുന്നതിനാല്‍ ഗതാഗതം നിയന്ത്രിച്ചിരുന്നു. ഇത് വന്‍ അപകടമൊഴിവാക്കി.
വിമാനത്തില്‍ ഇന്ധനച്ചോര്‍ച്ചയോ അഗ്നിബാധയോ ഉണ്ടായിട്ടില്ലെന്ന് പോലീസ് അറിയിച്ചു. സംഭവത്തില്‍ അന്വേഷണം ആരംഭിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: