ലണ്ടന്‍: നാടക പ്രദര്‍ശനത്തിനിടെ ലണ്ടനിലെ അപ്പോളോ തിയേറ്ററിന്റെ മേല്‍ക്കൂര തകര്‍ന്ന് വീണ് 85പേര്‍ക്ക് പരിക്കേറ്റു. ആരുടെയും പരിക്ക് ഗുരുതരമല്ല. മേല്‍ക്കൂരയുടെ അവശിഷ്ടങ്ങള്‍ക്കിടയില്‍ ആരും കുടുങ്ങിക്കിടക്കുന്നില്ലെന്ന് ഉറപ്പു വരുത്തിയതായി അധികൃതര്‍ അറിയിച്ചു. സംഭവത്തെക്കുറിച്ച് അന്വേഷണം തുടങ്ങി.
ലണ്ടനിലെ പ്രമുഖ നാടക തിയേറ്ററുകളി ഒന്നാണ് ‘ദ അപ്പോളോ’. ‘ദ ക്യൂരിയസ് ഇന്‍സിഡന്‍്റ് ഓഫ് ദ ഡോഗ് ഇന്‍ ദ നൈറ്റ് ടൈം’ എന്ന നാടകം നിറഞ്ഞ തിയേറ്ററില്‍ കളിച്ചുകൊണ്ടിരിക്കെയാണ് മേല്‍ക്കൂരയുടെ ഒരു ഭാഗം നിലം പൊത്തിയത്. ആ സമയത്ത് 700ലേറെ കാണികള്‍ അകത്തുണ്ടായിരുന്നു.
നാടകം തുടങ്ങി 40 മിനിട്ടായപ്പോള്‍ പ്രേക്ഷകര്‍ ഒരു വന്‍ ശബ്ദം കേള്‍ക്കുകയായിരുന്നു. അപകടം നടന്നയുടന്‍ ഇരുട്ടും പൊടിപടലവുംകൊണ്ട് തിയറ്ററിനകം മൂടിയതായും ആളുകള്‍ നിലത്ത് വീണു കിടക്കുന്നതായും കണ്ടുവെന്ന് ദൃക്സാക്ഷികളില്‍ ഒരാള്‍ പറഞ്ഞു.
പ്രതികരിക്കാൻ ഇവിടെ എഴുതുക: