പാറ്റ്‌ന: ആറുപേരുടെ മരണത്തിനിടയാക്കിയ സ്‌ഫോടനങ്ങള്‍ നടക്കുമ്പോള്‍ കേന്ദ്ര ആഭ്യന്തരമന്ത്രി സുശീല്‍ കുമാര്‍ ഷിന്‍ഡേ രജ്ജോ സംഗീതം ആസ്വദിക്കുകയായിരുന്നുവത്രെ.
സുരക്ഷാ പാളിച്ചയാണ് പാറ്റ്‌ന സ്‌ഫോടനങ്ങളിലേക്കു നയിച്ചതെന്ന വെളിപ്പെടുത്തല്‍ പുറത്തു വന്നതിനു പിന്നാലെയാണ് ഷിന്‍ഡേക്കെതിരെ ഗുരുതരമായ ആരോപണവുമായി ബിജെപി രംഗത്തെത്തിയത്.
26/11 ആക്രമണം നടക്കുമ്പോള്‍ ആഭ്യന്തര മന്ത്രിയായിരുന്ന ശിവരാജ് പാട്ടീല്‍ പത്രസമ്മേളനം നടത്താനായി നിരവധി തവണ വസ്ത്രം മാറിയത് ഏറെ വിവാദമായിരുന്നു. തുടര്‍ന്ന് പാട്ടീലിന് രാജിവക്കേണ്ടി വന്നു. സമാനമായ ആരോപണമാണ് ഷിന്‍ഡേക്കെതിരെ ഉയര്‍ന്നിട്ടുള്ളത്.
പാറ്റ്‌ന സ്‌ഫോടനത്തിന്റെ വാര്‍ത്ത കേട്ട് രാജ്യം നടുങ്ങി നില്‍ക്കുമ്പോള്‍ ആഭ്യന്തര മന്ത്രി അടുത്തിടെ പുറത്തിറങ്ങാനിരിക്കുന്ന സിനിമയിലെ പാട്ടും ഡാന്‍സും ആസ്വദിക്കുകയായിരുന്നു. സ്‌ഫോടനം നടന്ന് മൂന്നു മണിക്കുറുകള്‍ക്കു ശേഷം മുംബൈയിലെ ഒരു ചടങ്ങില്‍ ഷിന്‍ഡേ ചലച്ചിത്ര സംഗീതം ആസ്വദിക്കുന്നത് ഒരു പ്രാദേശിക ചാനലാണ് പുറത്തുവിട്ടത്.
കേന്ദ്ര സര്‍ക്കാരിന്റെ ഉതേതരവാദിത്തമില്ലായ്മയാണ് ഇത് തെളിയിക്കുന്നതെന്ന് ബിജെപി നേതാവ് സിദ്ഥാര്‍ത്ഥ് നാഥ് സിംഗ് കുറ്റപ്പെടുത്തി. എന്നാല്‍ താന്‍ സ്ഥിതിഗതിക്ള്‍ അപ്പപ്പോള്‍ അന്വേഷിക്കുന്നുണ്ടായിരുന്നുവെന്നാണ് ഷിന്‍ഡേയുടെ പ്രതികരണം.
പ്രതികരിക്കാൻ ഇവിടെ എഴുതുക: