കൊച്ചി: സോളാര്‍ തട്ടിപ്പുകേസില്‍ ചലച്ചിത്രതാരം ഉത്തര ഉണ്ണിയെ പോലീസ് ചോദ്യം ചെയ്യും. ഉത്തരാ ഉണ്ണി നിരവധി തവണ സോളാര്‍ കേസില്‍ അറസ്റ്റിലായ സരിത നായര്‍ക്കൊപ്പം വിമാന യാത്ര നടത്തിയിട്ടുണ്ടെന്ന് കണ്ടെത്തിയിട്ടുണ്ട്. ഇതേ തുടര്‍ന്നാണ് ഉത്തരയുടെ മൊഴി എടുക്കുന്നത്.
ദല്‍ഹിയിലേക്കും ചെന്നൈയിലേക്കും പലതവണ വിമാനയാത്രചെയ്തതിന്റെ രേഖകളാണ് പോലീസിനു ലഭിച്ചത്. എന്നാല്‍ കമ്പനി ഉടമകള്‍ നടത്തിയ സാമ്പത്തിക തട്ടിപ്പില്‍ ഉത്തരയ്‌ക്ക്‌ പങ്കുണ്ടോയെന്ന വിവരം വ്യക്തമായിട്ടില്ല. ഇക്കാര്യത്തെക്കുറിച്ച്‌ അന്വേഷണസംഘം പരിശോധിച്ചുവരികയാണ്‌.
യു.കെ ആസ്ഥാനമായി പ്രവര്‍ത്തിക്കുന്ന ടീം സോളാര്‍ കമ്പനിയുടെ ബ്രാന്‍ഡ് അമ്പാസഡറായി തെരഞ്ഞെടുത്തിരിക്കുന്നുവെന്നും എം.ഡി. ആര്‍ ബി നായര്‍ക്കും ലക്ഷ്മിക്കും നന്ദി രേഖപ്പെടുത്തുന്നുവെന്നും ഉത്തര തന്റെ ഫെയ്‌സ്ബുക്ക് പേജില്‍ കഴിഞ്ഞ ആഗസ്റ്റില്‍ രേഖപ്പെടുത്തിയിരുന്നു.
ഒരു മോഡല്‍ എന്ന നിലയില്‍ മാത്രമാണ്‌ മകള്‍ ടീം സോളാറുമായി ബന്ധപ്പെട്ട്‌ പ്രവര്‍ത്തിച്ചതെന്നും ഇക്കാര്യങ്ങള്‍ പോലീസിനെ ആദ്യം തന്നെ അറിയിച്ചിരുന്നതായും ഊര്‍മിള ഉണ്ണി പറഞ്ഞു. തട്ടിപ്പിന്‌ മകള്‍ കൂട്ടുനിന്നിട്ടില്ലെന്നും ഇവര്‍ വ്യക്തമാക്കി.
പ്രമുഖ നടി ഊര്‍മിളാ ഉണ്ണിയുടെ മകളാണ് ഉത്തരാ ഉണ്ണി. തമിഴില്‍ അറിയപ്പെടുന്ന താരമാണെങ്കിലും മലയാള സിനിമയല്‍ ഉത്തര അത്ര പരിചിതയല്ല. തമിഴ് സിനിമയിലൂടെ അരങ്ങേറ്റം കുറിച്ച ഉത്തരയുടെ ആദ്യ മലയാള ചിത്രം ഇടവപ്പാതിയാണ്.
പ്രതികരിക്കാൻ ഇവിടെ എഴുതുക: