പാലക്കാട്: തൃശൂര്‍ ചേലക്കരയില്‍ ടാക്സി ഡ്രൈവര്‍ രഘുവിനെ കൊലപ്പെടുത്തി വാഹനം തട്ടിയെടുത്ത കേസില്‍ ഒന്നാം പ്രതി അറസ്റ്റില്‍. വടക്കഞ്ചേരി കണ്ണമ്പ്ര കാരപ്പൊറ്റ സ്വദേശി പ്രസാദാ(30)ണ് അറസ്റ്റിലായത്. വീടിന്റെ സമീപത്തു നിന്നു പുലര്‍ച്ചെ പാലക്കാട് സി.ഐ ബി. സന്തോഷിന്റെ നേതൃത്വത്തിലുള്ള പോലീസ് സംഘമാണ് ഇയാളെ അറസ്റ്റ് ചെയ്തത്.
തൃശൂര്‍ ദേശമംഗലം വറവട്ടൂരിലെ ആസ്യ വധക്കേസിലും കൊട്ടാരക്കരയില്‍ സ്ത്രീയെ മാനഭംഗം ചെയ്തു കൊലപ്പെടുത്തിയ കേസിലും പ്രതിയാണ് പ്രസാദ്. ഡിസംബര്‍ ഏഴിനാണ് രഘുവിനെ തിരുനെല്ലായ് പുഴയില്‍ മരിച്ച നിലയില്‍ കണ്ടെത്തിയത്. ഈ കേസിലെ മറ്റ് പ്രതികളെയെല്ലാം നേരത്തെ അറസ്റ്റ് ചെയ്തിരുന്നു.
കണ്ണമ്പ്ര കാരപ്പൊറ്റ പടിഞ്ഞാറേ മുറി കൃഷ്ണദാസ് (29), പെരിങ്ങോട്ടു കുറിശി വടക്കുംപുറം കളരിക്കല്‍ ഹൗസില്‍ രാജേന്ദ്രന്‍(29), വടക്കാഞ്ചേരി കെ.പി കുന്ന് കുമരനെല്ലൂര്‍ മാങ്ങോട്ടില്‍ രജീഷ്(27), തൃശൂര്‍ എളനാട് കീടങ്കുന്നത്ത് സന്തോഷ് (24) എന്നിവരെയാണ് പോലീസ് നേരത്തേ അറസ്റ്റ് ചെയ്തത്.
പ്രതികരിക്കാൻ ഇവിടെ എഴുതുക: