കൊച്ചി: ഗാന്ധിജയന്തി വാരാചരണത്തിന്റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസിന്റെ നേതൃത്വത്തില്‍ സംഘടിപ്പിച്ച വിവിധ പരിപാടികള്‍ ഇന്ന്‌ സമാപിക്കും. ഇന്ന്‌ രാവിലെ 10-ന്‌ എറണാകുളം ഗാന്ധിഭവനില്‍ നടക്കുന്ന സമാപന സമ്മേളനം എക്സൈസ്‌ മന്ത്രി കെ.ബാബു ഉദ്ഘാടനം ചെയ്യും. ജില്ലാ കളക്ടര്‍ പി.ഐ. ഷെയ്ക്‌ പരീത്‌ അധ്യക്ഷത വഹിക്കുന്ന ചടങ്ങില്‍ മേയര്‍ ടോണി ചമ്മണി മുഖ്യാതിഥിയായിരിക്കും. ഡപ്യൂട്ടി മേയര്‍ ബി.ഭദ്ര, ഗാന്ധിഭവന്‍ സെക്രട്ടറി പ്രൊഫ.വി.പി.ജി. മാരാര്‍, പകല്‍വീട്‌ കണ്‍വീനര്‍ അഡ്വ.എം.ആര്‍. രാജേന്ദ്രന്‍നായര്‍ എന്നിവര്‍ പ്രസംഗിക്കും.
സമാപനസമ്മേളനത്തില്‍ ജില്ലയില്‍ നിന്നുള്ള പ്രമുഖരായ രണ്ടു സ്വാതന്ത്ര്യസമരസേനാനികളായ എ.കെ. ഭാസ്കരന്‍, വി.നാരായണന്‍നായര്‍ എന്നിവരെ പൊന്നാടയും ഉപഹാരവും നല്‍കി ആദരിക്കും.
ഒരാഴ്ചത്തെ വാരാചരണത്തിന്റെ ഭാഗമായി ജില്ലയില്‍ വിദ്യാര്‍ഥികള്‍ക്കും സര്‍ക്കാര്‍ ജീവനക്കാര്‍ക്കുമായി വിവിധ മല്‍സരങ്ങള്‍ നടത്തിവരികയാണ്‌. നവംബര്‍ ഒന്നിന്‌ നടക്കുന്ന മലയാളദിന സമ്മേളനത്തിലാണ്‌ മല്‍സരവിജയികള്‍ക്ക്‌ സമ്മാനങ്ങള്‍ നല്‍കുക. ഇന്ന്‌ രാവിലെ സമാപന ചടങ്ങുകള്‍ക്കുശേഷം ഗാന്ധിഭവനില്‍ ഹയര്‍സെക്കന്ററി വിദ്യാര്‍ഥികള്‍ക്കായി പ്രസംഗമല്‍സരം സംഘടിപ്പിച്ചിട്ടുണ്ട്‌. താല്‍പ്പര്യമുള്ളവര്‍ സ്കൂള്‍ അധികൃതരുടെ സാക്ഷ്യപത്രവുമായി രാവിലെ 10-ന്‌ ഗാന്ധിഭവനില്‍ എത്തണം.
പ്രതികരിക്കാൻ ഇവിടെ എഴുതുക: